Бухоро вилояти ИИБ раҳбарияти томонидан оталиққа олинган ва уюшмаган ёшлар билан очиқ мулоқот ўтказилди
2026-01-23 09:00:00 / Янгиликлар
Бухоро шаҳрида Бухоро вилояти ҳуқуқни муҳофаза қилувчи органлар раҳбарлари, вилоят Ички ишлар бошқармаси бошлиғи ҳамда вилоят Ёшлар ишлари агентлиги раҳбари иштирокида оталиққа олинган ва уюшмаган ёшлар билан очиқ ва самимий учрашув бўлиб ўтди.
Учрашувдан кўзланган асосий мақсад — ёшларнинг кундалик ҳаёти, таълим олиш жараёнлари, касб-ҳунарга бўлган қизиқишлари, шунингдек, уларни қийнаётган муаммо ва таклифларни бевосита жойида ўрганишдан иборат бўлди.
Мулоқот давомида ҳар бир ёшнинг фикри диққат билан тингланиб, уларнинг ижтимоий мослашуви ва келажагига дахлдор масалалар муҳокама қилинди.
Шунингдек, ёшларнинг бандлигини таъминлаш, уларни доимий иш ўринлари ва касб-ҳунар йўналишларига жалб этиш, соғлом турмуш тарзини шакллантириш, спорт ва маънавий-маърифий тадбирларда фаол иштирокини кенгайтириш, ҳуқуқий маданиятини юксалтиришга қаратилган чора-тадбирлар юзасидан аниқ таклиф ва тавсиялар билдирилди.
Учрашув давомида ёшлар томонидан кўтарилган ҳар бир масала масъуллар иштирокида атрофлича ўрганилиб, уларни ҳал этиш бўйича ёшларга бириктирилган раҳбарлар ҳамда мутасадди ташкилотларга тегишли кўрсатма ва топшириқлар берилди.
Мазкур масалаларнинг ижроси алоҳида назоратга олиниши таъкидланди.
Мазкур учрашувда жами 40 нафардан зиёд ёшлар ҳамда 120 нафарга яқин уюшмаган ёшлар иштирок этди. Улар томонидан жами 46 та муаммо ва мурожаат билдирилиб, ҳар бир мурожаат бўйича манзилли ечимлар белгиланди.
Учрашув якунида бир қатор ёшлар китоблар жамланмаси билан рағбатлантирилиб, уларнинг билимга бўлган қизиқишини ошириш ҳамда маънавий дунёсини бойитишга алоҳида эътибор қаратилди.
Бухоро вилояти ИИБ Ахборот хизмати