Сирдарё вилояти Сайхунобод туманида жиноят ва ҳуқуқбузарликларни барвақт олдини олиш ҳамда маҳаллаларда хавфсиз муҳитни яратиш борасидаги амалга оширилаётган ишлар ўрганилди
2026-01-23 09:00:00 / Янгиликлар
Сирдарё вилояти Ички ишлар бошқармаси бошлиғи ҳамда Прокурори Сайхунобод туманига ташриф буюриб, қизил тоифага киритилган Нуробод маҳалласида жиноят ва ҳуқуқбузарликларнинг олдини олиш бўйича амалга оширилаётган ишлар билан танишди.
Ташриф давомида масъул раҳбарлар маҳалла еттилиги аъзолари билан учрашиб, улар томонидан ҳудудда криминоген вазият барқарорлигини таъминлаш, ёшлар ўртасида ҳуқуқбузарликларнинг олдини олиш, оилалардаги муаммоларни барвақт аниқлаш ва уларни ҳал этиш бўйича амалга оширилаётган ишлар, маҳаллада жиноятчиликка олиб келаётган омиллар таҳлил қилинди.
Суҳбат жараёнида вилоят прокурори ва вилоят Ички ишлар бошқармаси бошлиғи томонидан профилактика ишларини янада кучайтириш, маҳалла еттилиги фаолияти самарадорлигини ошириш, аҳоли билан яқин ҳамкорликни йўлга қўйиш ҳамда ҳар бир мурожаатни ўз вақтида ҳал этиш зарурлиги алоҳида таъкидланди.
Ташриф якунида жойларда жиноят ва ҳуқуқбузарликларнинг барвақт олдини олиш, маҳаллада хавфсиз муҳитни таъминлаш ҳамда «қизил тоифа»дан чиқаришга қаратилган аниқ вазифалар белгилаб берилди.
Сирдарё вилояти ИИБ Ахборот хизмати