Ўзбекистон Республикаси Ички ишлар вазирлиги

Жорий йилнинг 18 май куни Бухоро вилояти Ички ишлар бошқармасида бошқарма бошлиғи подполковник Икромжон Турсунов бошчилигида, Ўзбекистон Республикаси Президенти ҳузуридаги Давлат хизматини ривожлантириш агентлиги Бухоро вилояти филиали раҳбари Зафар Жумаев ҳамда ушбу агентликнинг масъул ходимлари иштирокида норматив ҳужжатлар талабларини ўрганиш юзасидан ўқув машғулоти ўтказилди.

Машғулотда бошқарма бошлиғининг барча ўринбосарлари, соҳавий хизматлар раҳбарлари, шаҳар ва туман ички ишлар органларига бириктирилган масъул раҳбарлар, жойлардаги 3-сектор раҳбарлари ҳисобланган ҳудудий ички ишлар органларининг бошлиқлари ва уларнинг секторлар фаолияти бўйича котиблари иштирок этишди.

Ўқув машғулотини олиб борган Агентлик масъул ходимлари томонидан тингловчиларга норматив-ҳуқуқий ҳужжатлардан келиб чиқиб, маҳалла институтининг жамиятдаги ролини тубдан ошириш, маънавий-маърифий ишларни самарали ташкил этиш ҳамда «Обод хонадон», «Обод кўча» ва «Обод маҳалла» мезонларини жорий этишга доир чора тадбирларнинг амалга оширилиши, сектор раҳбарларининг фаолиятини баҳолаш бўйича вазифа ва кўрсатгичларни кўтариш, сектор аъзолари ва маҳаллалар еттилигининг фаолият мезонлари, ушбу фаолият билан боғлиқ келиб тушган мурожаатларни кўриб чиқиш тартиби, сектор кўрсатгичларининг шаклланиши ва бошқа бир қатор йўналишлар юзасидан тушунчалар берилиб, мавзуга ҳамда маҳалла еттилиги ва сектор штаби аъзоларининг ҳамкорликдаги вазифалари юзасидан қўшимча ўқув машғулотларини ўтказиш, уларнинг биргаликдаги фаолияти самарадорлигини оширишга доир тавсия ҳамда кўрсатмалар берилди.

Машғулотдан сўнг, бошқарма бошлиғи томонидан бир қатор долзарб масалар юзасидан тезкор йиғилиш ўтказилди.

Якунда, бошқарма бошлиғи томонидан кўриб чиқилган ҳар бир масала юзасидан раҳбар ва масъул ходимларга тавсия, кўрсатма ҳамда бажариш муддатларини аниқ кўрсатилган топшириқлар берилиб ижроси алоҳида назоратга олинди.

Бухоро вилояти ИИБ Ахборот хизмати