2026-jıl barlıq tarawlardı rawajlandırıwda túpkilikli burılıs jılı boladı

– Keyingi toǵız jılda biz sizler menen, el-xalqımız benen birgelikte úlken rawajlanıw jolın basıp óttik. Ekonomikamız jańadan qáliplesti, bazar qatnasıqların, sociallıq qorǵawdı keńeyttik, nızam ústinligin bekkemledik. Eń áhmiyetlisi, reformalarımızdıń nátiyjesin hár bir máhálle, hár bir shańaraq hám hár bir insan kúndelikli turmısında sezbekte, – dedi mámleketimiz basshısı sóziniń aldında.

Qanshelli awır bolmasın, baslanǵan demokratiyalıq reformalar isenimli dawam ettirilgeni, xalqımızdıń qollap-quwatlawı hám jaslarımızdıń kúsh-ǵayratı, awızbirshiliktiń tiykarı bolǵan máhálleniń turmısımızdaǵı ornı hám tásiri kúsheytilgeni, adamlardıń sana-sezimi hám dúnyaqarası ózgerip, el-jurtımız jáne de birleskeni, isbilermen, diyqan hám fermerlerdiń intakerligi hám mártlik miyneti, óz-ara paydalı birge islesiwge tiykarlanǵan doslıq sırtqı siyasat esabınan 2025-jılı barlıq tarawlarda úlken jetiskenliklerge erisildi.

Bıyıl tariyxımızda birinshi márte jalpı ishki ónimimiz 145 milliard dollardan astı. Usı jılı eksportımız 23 procentke artıp, 33,4 milliard dollarǵa jetkeriletuǵını atap ótildi. Eń áhmiyetlisi, altın-valyuta rezervlerimiz birinshi márte 60 milliard dollardan astı.
Ekonomikamızǵa tartılǵan sırt el investiciyalarınıń kólemi 43,1 milliard dollarǵa jetti. Jámi investiciyalardıń jalpı ishki ónimdegi úlesi 31,9 procentti quramaqta. Jetekshi xalıqaralıq reyting agentlikleri mámleketimizdiń suveren reytingin “BB-”dan “BB”dárejesine kóterdi.

Energetika tarawında túpkilikli burılıs jasalǵanı esabınan elektr islep shıǵarıw kólemi 85 milliard kilovatt-saatqa jetkerildi.
Bıyıl 188 máhálledegi 715 mıń xalıq jasaytuǵın shańaraqlarǵa birinshi márte taza ishimlik suwı kirip bardı, jáne 2 million 300 mıńǵa shamalas xalıqtıń suw támiynatı jaqsılandı.
Usı jılı 5 million xalıq dáramatlı bolıp, jumıssızlıq dárejesi 5,5 procentten 4,9 procentke tústi. Derlik 1,5 million járdemge mútáj xalıq kámbaǵallıqtan shıqtı, birinshi márte 1 mıń 435 máhálle “kámbaǵallıqtan jıraq” aymaqqa aylandı.
Kámbaǵal shańaraqlarǵa tiyisli 168 mıń bala mámleketlik baqshalarǵa jeńilletilgen tiykarda qabıl etildi. Usı jıldan baslap 208 baqshaǵa birinshi márte inklyuzivlik bilimlendiriw sisteması engizildi.
Elimizde kámbaǵallıq dárejesi jıl basındaǵı 8,9 procentten 5,8 procentke tústi.

– Bul jumıslardı baslaǵanımızda xalıqtıń úshten bir bólegi kámbaǵallıq shegarasında jasaytuǵın edi. Kredit, subsidiya, kompensaciya sıyaqlı 100 den aslam xızmetler arqalı sociallıq qorǵawdıń pútkilley jańa sistemasın jolǵa qoyǵanımız hám olardı máhálledegi “jetilik”tiń ózine bergenimiz nátiyjesinde 8,5 millionnan aslam adam kámbaǵallıqtan shıqtı, jumıssızlıq 2 esege qısqardı.

Nátiyjede úsh jıl aldın kámbaǵallıqtı 2026-jıldıń aqırına shekem 2 esege qısqartıw boyınsha alǵan maqsetimizge usı jıldıń ózinde eristik, – dedi Prezidentimiz.
Talantlı ul-qızlarımız bilimlendiriw, ilim, mádeniyat, kórkem óner, sport hám basqa da tarawlarda erisip atırǵan úlken tabısları menen de Jańa Ózbekstanımızdıń rawajlanıwına múnásip úles qosıp atırǵanı atap ótildi.
Keyingi waqıtta elimiz globallıq máseleler dodalanatuǵın xalıqaralıq qarım-qatnas maydanına aylanıp barmaqta.

Atap aytqanda, bıyıl Parlamentleraralıq awqamnıń 150-yubiley Assambleyası, YuNESKO Bas konferenciyasınıń sessiyası, “Oraylıq Aziya – Evropa Awqamı” sammiti hám xalıqaralıq Klimat forumı biziń elimizde bolıp ótti.
Sonday-aq, Ózbekstan, Tájikstan hám Qırǵızstan jetekshileriniń mart ayında Xojendte bolıp ótken ushırasıwında birinshi márte úsh mámleket mámleketlik shegaralarınıń tutasqan noqatı haqqında tariyxıy shártnamaǵa qol qoyıldı hám “Máńgi doslıq haqqındaǵı deklaraciya” qabıl etildi.

Regionımız mámleket basshılarınıń jaqında Tashkenttegi Másláhát ushırasıwı waqtında integraciya processlerin jańa sapa basqıshına kóteriw ushın Oraylıq Aziya jámiyetshiliginiń strategiyalıq formatın shólkemlestiriw ideyası alǵa qoyıldı. Ázerbayjandı Oraylıq Aziya formatına tolıq huqıqlı aǵza sıpatında qabıl etiw haqqındaǵı qarar tariyxıy áhmiyetke iye boldı.

Prezidentimizdiń atap ótkenindey, bul qádem Oraylıq Aziya hám Qubla Kavkaz arasında strategiyalıq baylanıslılıq hám turaqlılıqtı kúsheytiwi sózsiz.
Oktyabr ayında Bryusselde Ózbekstan hám Evropa Awqamı arasında Keńeytilgen sheriklik hám birge islesiw haqqındaǵı kelisimge qol qoyıldı. Noyabr ayında bolıp ótken Oraylıq Aziya hám AQSh sammiti kóp tárepleme hám uzaq múddetli sheriklikti sapa jaǵınan pútkilley jańa basqıshqa alıp shıǵıwǵa xızmet etti. Ótken háptede Tokioda Oraylıq Aziya hám Yaponiya jetekshileriniń ushırasıwında bilimlendiriw, medicina, sanlı texnologiyalar, infrastruktura hám sanaat tarawları boyınsha áhmiyetli kelisimlerge erisildi.

Usı hápteniń basında bolsa Sankt-Peterburgta Ǵárezsiz Mámleketlerdiń Doslıq Awqamı basshıları menen bolıp ótken ushırasıw da birge islesiwdiń jańa baǵdarların belgilep berdi.
– Bulardıń barlıǵı xalıqaralıq baylanıslarımızdı mazmunı jaǵınan jańa basqıshqa alıp shıqpaqta. Biz dúnyanıń alıs-jaqın mámleketleri menen Shıǵıs hám Batıs, Arqa hám Qubla menen birge islesiw kópirlerin qurıwda dawam etemiz, – dedi Prezidentimiz.

Máhálle hám jaqsı qońsıshılıq óz-ara únles qádiriyatlar bolıp esaplanadı. Olar jámiyette sociallıq kapitaldı jáne de bayıtıwǵa sheksiz úles qosadı.
Elimizde ótkerilgen sociallıq sorawlarda qatnasqanlardıń 90 procenti ózin máhálle jámiyetshiliginiń bir bólegi dep esaplawı da sonnan derek beredi. Máhállege usı tiykarda Watan táǵdirine baylanıslılıq sezimi joqarılıǵı bul institut, bárinen burın, sociallıq tilekleslik deregi ekenin kórsetedi.
– Tariyx dawamında qanday awır sınaqlarǵa dus kelsek te, biz bárinen burın awızbirshilikten kúsh aldıq. Mashaqatlı kúnlerde adamlarımız, máhálle xalqı iyinles bolıp qıyınshılıqlardı jeńgen. Shańaraq – shańaraqqa, qońsı – qońsıǵa járdem berip jasaǵan. Biz mine usınday oǵada biybaha qádiriyatımızǵa bárqulla sadıq qalıwımız, jas áwladımızdı mine usı ruwxta tárbiyalawımız kerek.

Búgingi kúnde jámiyetimizde hár qıylı pikir hám kózqaraslar bolıwı tábiyǵıy. Bul – demokratiyanıń birlemshi talabı.
Biraq milleti, tili hám dinine qaramastan, 38 millionlıq el-jurtımızdı birlestiretuǵın ullı bir ideya bar. Ol da bolsa, Watan mápi, xalqımızdıń mápi.

Mine, usınday ullı maqsetke erisiwde máhálle sistemasınıń ornı hám tásiri sheksiz. Sebebi máhálle tınısh hám tatıw bolsa, jámiyetimiz tınısh hám awızbirshilikli boladı. Máhálle rawajlansa, pútkil elimiz rawajlanadı, – dedi Prezidentimiz.
Usılardıń barlıǵın esapqa alıp, Prezidentimiz 2026-jıldı elimizde “Máhálleni rawajlandırıw hám jámiyetti ilgeriletiw jılı,” dep járiyalawdı usınıs etti.
Bul baslamanı jıynalǵanlar qızǵın qollap-quwatladı.

Jańa jıl baǵdarlamasında elimizdegi 9 mıńnan aslam máhálleni, bárinen burın, miyrim-shápáát, awızbirshilik, ádillik hám tárbiya orayına aylandırıw sıyaqlı áhmiyetli máseleler óz kórinisin tabadı.
– Biz Jańa Ózbekstandı qurıwda sheshiwshi basqıshqa qádem qoymaqtamız. Bul joldaǵı jumıslarımız hár bir taraw hám tarmaqta tereń transformaciyanı talap etedi.

Maqsetimiz anıq: jaqın jıllarda dáramatı ortashadan joqarı mámleketler qatarına kiriw.
Ferǵana oypatınan Aralboyına shekem, Zarafshan oypatınan Qashqadárya hám Surxandáryaǵa shekem, Tashkentten Jizzaq hám Sırdáryaǵa shekem – elimizdiń qaysı aymaǵında jasamasın, hár bir puqaramız búginnen baslap reformalardıń nátiyjesin kúndelikli turmısında jáne de kóbirek seziwi kerek.

Sonıń ushın kirip kiyatırǵan 2026-jıl mámleketlik basqarıw, sud-huqıq sisteması, ekonomika tarmaqları, bilimlendiriw, ilim, medicina, mádeniyat, sport, ekologiya sistemasın – barlıq tarawlardı rawajlandırıwda túpkilikli burılıs jılı boladı, – dedi Prezidentimiz.
Mámleketimiz basshısı 2026-jılı ámelge asırılatuǵın eń áhmiyetli tiykarǵı baǵdarlarǵa ayrıqsha toqtap ótti.
Birinshi tiykarǵı baǵdar máhálle infrastrukturasın bunnan bılay da jaqsılaw, olarǵa Jańa Ózbekstan kórinisin alıp kiriwden ibarat.
Máhálle infrastrukturasın túp-tiykarınan jaqsılaw arqalı mámleketimizdi hár tárepleme rawajlandırıw, onıń kelbetin jáne de gózzal hám abat etiw jumısları dawam ettiriledi.

Kelesi jıldan máhálleni rawajlandırıw boyınsha kompleksli qatnas engiziledi. Urbanizaciya hám qalalardı turaqlı rawajlandırıw boyınsha jańa reformalar baslanadı.
Isbilermenlikti qollap-quwatlaw boyınsha siyasat dawam ettirilip, 2026-jılı tiykarǵı salıq stavkaları ózgerissiz qaldırıladı, isbilermenlik infrastrukturası joybarlarına 10 trillion sumnan aslam qarjı ajıratıladı. Kishi hám orta biznesti rawajlandırıw ushın 140 trillion sum resurs beriledi. Sonnan 43 trillion sumı hayal-qızlar hám jaslar isbilermenligin qollap-quwatlawǵa qaratıladı.
Ekinshi tiykarǵı baǵdar – ekonomikanı texnologiyalıq hám innovaciyalıq ósiw modeline ótkeriw.

Bunnan bılay hár bir dollar investiciya, bárinen burın, aldınǵı texnologiyalar transferi, sırt elde bazarı anıq, joqarı qosımsha qunlı ónimler islep shıǵarıwǵa, energiya, suw, jer hám basqa da tábiyǵıy resurslardan paydalanıwda nátiyjelilikti arttırıwǵa, jergilikli jumısshılardı jańa texnologiyalar menen islewge oqıtıw hám miynet ónimdarlıǵın arttırıwǵa xızmet etiwi kerek ekenligi atap ótildi.
Jańa texnologiyalıq basqıshqa ótiw hám qosımsha qun shınjırın keńeytiw boyınsha sanaattı rawajlandırıw baǵdarlaması baslanadı. 2026-jılı 52 milliard dollarlıq 782 jańa sanaat hám infrastruktura joybarına start beriledi. Kelesi jıldıń ózinde 14 milliard dollarlıq 228 jańa iri quwatlıqlar iske qosıladı.

Kelesi jılı ekonomikada 6,6 procent ósiwdi támiyinlep, jalpı ishki ónimdi 167 milliard dollarǵa jetkeriw prognoz etilmekte.
Innovaciya tiykarında joqarı texnologiyalıq ónim islep shıǵarıp atırǵan kárxanalar xoshametlenedi. Kárxana qánigeleriniń ilimiy-izertlew hám konstruktorlıq qollanbalardan alǵan dáramatı salıqtan azat etiledi.

Kelesi jılı Tashkent qalası, Buxara, Ferǵana hám Tashkent wálayatında 4 data-oray, 2 super kompyuter hám 15 joqarı oqıw ornında jasalma intellekt laboratoriyasınıń jumısı jolǵa qoyıladı. Bul medicina, transport, awıl xojalıǵı, geologiya, bank-qarjı, jámiyetlik qáwipsizlik sıyaqlı áhmiyetli tarawlarda 100 den aslam jasalma intellekt joybarların ámelge asırıwǵa xızmet etedi.
– Búgin sizlerge jáne bir áhmiyetli jańalıqtı aytpaqshıman. Ǵárezsiz Ózbekstan tariyxında birinshi márte kosmos tarawında jasalma joldas hám mámleketimiz puqarası bolǵan birinshi ózbek kosmonavtın kosmosqa ushırıw boyınsha jumıslardı basladıq, – dedi Prezidentimiz.

Mámleketimiz basshısı úshinshi tiykarǵı baǵdar – ishki bazarda talaptı xoshametlew máselesine toqtap ótti.
Toǵız jılda qolaylı biznes ortalıǵı jaratılıp, tovar hám xızmetlerdiń kólemi hám túri kóbeytilgeni, kem dáramatlı shańaraqlar ushın jılına keminde 1 milliard dollar arzan kredit berilip atırǵanı, inflyaciya dárejesi “bir xanalı” sanǵa túsirilgeni nátiyjesinde xalıqtıń satıp alıw qábileti 2 esege ósti.

Xalıqtıń talabınan kelip shıǵıp, ekonomikada eń úlken talap jaratatuǵın turaq jay ipotekasına 2026-jılı 23 trillion sum resurs ajıratıladı. Turaq jay satıp alıwda baslanǵısh tólem hám procent tólemleriniń bir bólegin qaplaw ushın 2 trillion 700 milliard sum subsidiya beriledi. Sonday-aq, bir kvartira ushın ajıratılatuǵın jeńilletilgen ipoteka kreditiniń muǵdarı 15 procentke arttırıladı.

Xızmetlerge bolǵan talaptı xoshametlew ushın 2026-jılı tarawǵa 85 trillion sum kredit, 9 trillion sum subsidiya ajıratıladı. Atap aytqanda, bilimlendiriw xızmetleri ushın byudjetten 7 trillion sum beriledi.
Keyingi bes jılda sırt elli turistlerdiń sanın 2 esege arttırıw, turizm xızmetleriniń kólemin bolsa 20 milliard dollarǵa jetkeriw boyınsha úlken shek qoyılmaqta. Usı maqsette turizm infrastrukturasın rawajlandırıwǵa ayrıqsha itibar qaratıladı.

Turistler aǵımınıń barǵan sayın artıp atırǵanı aviaciya hám temir jolda jolawshı tasıw quwatlılıǵın 2 esege kóbeytiwdi talap etpekte. Sol sebepli, 2026-jılı aviaparktegi hawa kemeleriniń sanı 120 ǵa jetkeriledi.
Ishki temir jollardı rawajlandırıw boyınsha bes jıllıq baǵdarlama qabıl etiledi. Qalalardı tezjúrer poezdlardıń qatnawı menen baylanıstırıw ushın 2026-jıldan jáne 500 kilometr temir jol qurılısı baslanadı. Avtomobil jollarınıń sapasın jaqsılaw, tranzit potencialın jáne de arttırıw maqsetinde bes jıllıq baǵdarlama ámelge asırıladı.

Kásiplerdi rawajlandırıw hám jańa miynet bazarı arxitekturasın jaratıw kelesi jıl ushın baǵdarlamanıń tórtinshi tiykarǵı baǵdarı bolıp esaplanadı.
Házirgi waqıtta jańa texnologiyalar, sanlastırıw hám jasalma intellekt tásirinde dúnyada jumıs orınlarınıń sanı, túri hám mazmunı keskin ózgermekte. Jaqın bes jılda bar kásiplerdiń 30 procenti tolıq avtomatlastırıladı, 50 procenti boyınsha bolsa jańa mamanlıqlar talap etiledi.
– Endi mámleketimiz miynet bazarı pútkilley jańa arxitektura tiykarında – kásip, mamanlıq, texnologiya hám bilimlendiriwdi birlestiretuǵın birden-bir mexanizm sıpatında islewi zárúr, – dedi Prezidentimiz.
2026-jıldan baslap hár jılı keminde 100 den texnikum tolıq ońlanıp, texnologiyalıq hám talap joqarı bolǵan kásiplerge sáykes halda úskenelenip barıladı. Germaniya, Shveycariya, Ullı Britaniya, Qıtay, Koreya sıyaqlı mámleketlerdiń aldınǵı bilimlendiriw baǵdarlamaları engizilgen texnikumlardıń sanı 100 ge jetkeriledi.
2026-jılı 7 wálayatta, 2027-jılı bolsa qalǵan aymaqlarda Aldınǵı kásiplik sheberlik texnikumı hám “Kásipler qalashası”nıń jumısı jolǵa qoyıladı.

Medicina sistemasında da kásiplik bilimlendiriwdi rawajlandırıw ushın Angliyanıń “Pearson” kompaniyası menen hár bir aymaqtaǵı birewden texnikumda xalıqaralıq standart tiykarında miyirbiykeler tayarlaw baslandı. Endi mine usı texnikumlarǵa Germaniya, Shveycariya, AQSh, Yaponiya sıyaqlı mámleketlerdiń bilimlendiriw baǵdarlamaları da engiziledi.
Usı tiykarda xalıqaralıq talaplarǵa juwap beretuǵın, shet tillerdi biletuǵın miyirbiykeler quramı qáliplestiriledi.
Besinshi tiykarǵı baǵdar – ekologiyalıq teńsalmaqlılıqtı támiyinlew, “jasıl” energetika hám suw resurslarınan aqılǵa uǵras paydalanıw.

Iri kárxanalarǵa filtr, tazalaw qurılması hám hawaǵa shıǵarılatuǵın zıyanlı zatlardı monitoring etiw stanciyasın ornatıw ushın 100 million dollarlıq kredit liniyası ashıladı.
Qalalardaǵı tıǵılıslar tek ǵana adamlardıń turmısın qıyınlastırıp qoymastan, al ekologiyaǵa da úlken zıyan keltirip atırǵanı atap ótildi. Sonlıqtan, dúnya tájiriybesinen kelip shıǵıp, avtomobiller shıǵarıp atırǵan zıyanlı elementlerdiń dárejesine qarap ekologiyalıq stikerler beriw sisteması engiziledi.

Úlken muǵdarda zıyanlı elementler shıǵaratuǵın avtomashinalardıń paytaxt hám wálayat orayları jáne qalalarǵa kiriwi sheklenedi. Bunday transport quralların jańasına almastırıw yamasa olarǵa filtr ornatıw ushın mámleket tárepinen qollap-quwatlaw ilajları kóriledi.

Eski mashinasın almastıraman degenlerge avtokredit procentiniń bir bólegi qaplap beriledi. Filtr ornatıp, zıyandı azaytıwǵa tayar bolǵan aydawshılar ushın qárejetleriniń bir bólegi boyınsha subsidiya ajıratıladı.
Paytaxtımız hám iri qalalarda jámiyetlik transporttı rawajlandırıw tiykarǵı wazıypa boladı.
Ekologiyalıq avtomobillerdi kóbeytiw boyınsha bes jıllıq baǵdarlama ámelge asırıladı. Onda jergilikli elektromobillerge 12 procentlik, sırt el elektromobillerine bolsa 16 procentlik avtokreditler ajıratıladı.

Elektromobillerdi quwatlaw stanciyaların shólkemlestiriw ushın isbilermenlerge 10 procentlik jeńilletilgen kreditler beriledi, jerlerdi aukcionnan 2 ese arzan bahada satıp alıw imkaniyatı jaratıladı.
Elektromobillerdi quwatlaw stanciyalarında avtomobillerdi zaryadlawda 1 kilovatt-saat elektr energiyası bahasınıń 300 sumnan asqan bólegi mámleketlik byudjetten qaplap beriledi. Elektromobilde taksi xızmetin kórsetetuǵın puqaralarǵa da bir qatar jeńillikler beriledi.

Shań-tozańlardıń aldın alıw ushın Surxandáryada 10 mıń gektarda “jasıl mákan” hám Sırdáryada 84 kilometrlik “jasıl diywal” qurıladı. Qaraqalpaqstan, Xorezm, Buxara hám Nawayıda jámi 250 mıń gektar, sonıń ishinde, Araldıń qurıǵan ultanında 115 mıń gektar jerde terek hám putalar egiledi. Hár bir aymaqta botanika hám dendrologiya baǵları jáne 20 danadan saya-salqın seyil etiw kósheleri qurıladı.
Ulıwma, ekologiya tarawına 2026-jılı 1 trillion 900 milliard sum qaratıladı.
Suwdı únemleytuǵın texnologiyalardı engiziw ilajlarına 2026-jılı jámi 3 trillion 300 milliard sum qaratıladı.

Sonday-aq, 1 mıń 300 kilometr iri magistral kanallar beton menen qaplanadı. Bul qosımsha túrde jılına 500 million kub metr suwdı únemlew imkaniyatın beredi. Bunnan tısqarı, orınlardaǵı ashıq drenaj hám kollektorlardı jabıq sistemaǵa ótkeriw boyınsha óz aldına baǵdarlama qabıl etiledi. Kanallardı jabıq sistemaǵa ótkeriw boyınsha da úlken joybarlar baslanadı.
160 million dollarlıq úlken baǵdarlama sheńberinde Tashkent qalasında 150 kilometr jabıq drenaj sisteması qurıladı, 197 kilometr kanal hám kollektorlar ońlanadı, 63 kilometr jańa kanallar qurılıp, qalada salqın mikroklimat jaratıladı.
Altınshı tiykarǵı baǵdar – zamanagóy mámleketlik basqarıw hám ádil sud-huqıq sisteması baǵdarındaǵı reformalar dawam ettiriledi.

Bárinen burın, 2026-jıldan baslap Elektron húkimet platforması túp-tiykarınan jańalanadı.
Endi barlıq mámleketlik uyımlardıń 1 mıńnan aslam mámleketlik xızmetleri, 5 mıńnan aslam funkciya hám wazıypaları, 240 maǵlıwmatlar bazası hám málimleme sisteması, 100 mıńnan aslam mámleketlik xızmetkerdiń máhálle, rayon, wálayat, respublika dárejesindegi wákillikleri Birden-bir sanlı platformaǵa integraciyalanadı.
– Eń áhmiyetlisi, mámleketlik xızmetlerdi kórsetiwde insan faktorısız, korrupciya hám artıqsha byurokratiyadan jıraq ekosistema jaratamız. Mámleketlik xızmetlerdi proaktiv hám jıynalǵan túrde kórsetiw sistemasın rawajlandıramız,-dedi mámleketimiz basshısı.

Bunnan bılay mámleketlik satıp alıwlarda tovar, jumıs hám xızmetlerdi tikkeley satıp alıw múmkin bolǵan jaǵdaylar tek ǵana nızam menen belgilenedi.

Konstituciyalıq reformalar sheńberinde wálayat hákimleri hám jergilikli keńeslerdiń baslıqları lawazımları bir-birinen ajıratılǵan edi. Endi bul sistema 2026-jıldan 208 rayon hám qalada da jolǵa qoyıladı.
Mámleketimiz basshısı reformalardıń nátiyjeliligin támiyinlewde puqaralıq jámiyeti institutlarınıń roli áhmiyetli ekenin atap ótti. Sol sebepli, olardı qollap-quwatlaw boyınsha siyasat keleshekte de izbe-iz dawam ettiriledi. Atap aytqanda, puqaralıq jámiyetin rawajlandırıw baǵdarında bes jıllıq strategiya islep shıǵıladı.
– Tákirarlap aytaman, elimizdegi keń kólemli jańalanıwlar dáwirinde ashıq-aydınlıq siyasatınan hesh qashan artqa qaytpaymız. Sóz hám baspasóz erkinligin támiyinlew tiykarǵı wazıypamız bolıp qaladı,- dedi Prezidentimiz.
Sud-huqıq sistemasın xalıqqa jaqınlastırıwǵa qaratılǵan jumıslar izbe-iz dawam ettiriledi.
Ádil sudlawdı ámelge asırıwda jámiyetshiliktiń qatnasıwı hám roli arttırıp barılatuǵını atap ótildi. Endi jınayat procesine inglis huqıqındaǵı mámleketlerde unamlı nátiyje bergen “Xalıq wákilleri kollegiyası” institutı basqıshpa-basqısh engiziledi.

Narkojınayatlarǵa qarsı gúresiw ulıwma milliy háreketke aylandırılıp, jámiyette bul illetke mawasasız ortalıq jaratıladı.
Hayal-qızlar hám balalarǵa bolǵan zorlıqtıń aldın alıwda barlıq mámleketlik uyımlar hám keń jámiyetshilikti mobilizaciya etken halda bunday unamsız jaǵdaylardı saplastırıw boyınsha nátiyjeli isleytuǵın sistema jaratıw tapsırıldı.
– Korrupciya – mámlekettiń rawajlanıwına tosqınlıq etetuǵın, ádillik hám nızam ústinligin izden shıǵaratuǵın, jámiyette isenim ortalıǵın tómenletetuǵın eń áhmiyetli qáwip. Korrupciyaǵa jol qoyıw bolsa reformalarımızǵa qıyanet!
Bul illetke qarsı gúresiw boyınsha 2026-jılı “ayrıqsha jaǵday” járiyalaymız,-dedi mámleketimiz basshısı.
Barlıq uyımlarda komplaens hám korrupciyaǵa qarsı ishki qadaǵalawǵa juwapker orınbasar lawazımı engiziledi. Esap palatasınıń wákili jumısı jolǵa qoyıladı. Mámlekettiń hár bir sum qarjısı, resursı boyınsha jeke juwapkershilik kúsheytiledi.

Dúnyada quramalı geosiyasiy hám ekonomikalıq mashqalalar barǵan sayın háwij almaqta. Bunday qıyın jaǵdayda barlıq mámleketler menen teń huqıqlı hám konstruktivlik qatnasıqlardı bunnan bılay da bekkemlew, turaqlı ashıq sırtqı siyasat alıp barıwǵa qaratılǵan jumıs dawam ettiriledi. Abıraylı xalıqaralıq hám regionallıq shólkemler, ekonomikalıq institutlar menen tıǵız birge islesiw jańa basqıshqa alıp shıǵıladı.
– Erisilgen úlken nátiyjeler, jańa tiykarǵı wazıypalar “Ózbekstan – 2030” strategiyasın qayta kórip shıǵıwdı talap etpekte.
Elimizdiń kelesi bes jıllıq rawajlanıwına baylanıslı bolǵan bul hújjet keń jámiyetshiliktiń dodalawınan ótkerilip, xalıqtıń pikir-usınısları tiykarında jetilistiriledi, – dedi Prezidentimiz.

Kelesi jılı sociallıq-mádeniy turmısımızdaǵı áhmiyetli sáneler keńnen belgileniwi atap ótildi. Sonıń ishinde, Watanımız ǵárezsizliginiń dańqlı 35 jıllıǵı úlken bayram sıpatında ótkeriledi. Sahıpqıran Ámir Temur, Mir Áliysher Nawayı babalarımızdıń qutlı tuwılǵan kúnlerine tayarlıqtı házirden baslaw kerek ekenligi atap ótildi.
– Búgin tariyxtıń ózi, turmıstıń ózi bizge úlken bir juwapkershilikti júklemekte. Janajan Watanımız búgin jańasha siyasiy-huqıqıy, sociallıq, ruwxıy qatnasıqlar tiykarında jasap, miynet etip atırǵan, erkin pikirleytuǵın, azat hám azat insanlardıń úlkesine aylanbaqta.

Bir bolsaq, birden-bir xalıq, birden-bir millet bolıp háreket etsek, gózlegen úlken maqsetlerimizge álbette jetemiz! Men bul jolda márt hám ullı mártebeli xalqımızǵa isenemen! Ózbekstannıń sheksiz kúshi hám imkaniyatlarına, áziz jaslarımızdıń kúsh-ǵayratına isenemen! – dedi Prezidentimiz Múrájatınıń juwmaǵında.