O‘zbekiston Respublikasi Yoshlar ishlari agentligida jismoniy va yuridik shaxslarning murojaatlari bilan ishlash tartibi O‘zbekiston Respublikasining “Jismoniy va yuridik shaxslarning murojaatlari to‘g‘risida”gi qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Namunaviy Nizomi hamda O‘zbekiston Respublikasi Yoshlar ishlari agentligi markaziy apparati, hududiy bo‘linmalari va Agentlik huzuridagi Yoshlar muammolarini o‘rganish va istiqbolli kadrlarni tayyorlash institutida jismoniy va yuridik shaxslarning murojaatlari bilan ishlash tartibi to‘g‘risidagi nizomiga muvofiq tashkil etiladi.

Jismoniy va yuridik shaxslar Yoshlar ishlari agentligiga quyidagi manbalar orqali murojaat qilishi mumkin:

• Prezident virtual va xalq qabulxonalari;
• 1093 qisqa telefon raqami;
• info@yoshlar.gov.uz elektron pochtasi;
• https://gov.uz/oz/yoshlar sayti;
• Agentlikning Telegram ijtimoiy tarmog‘idagi rasmiy sahifalari orqali
  (https://t.me/+St-_kvhePJkzZTAy; https://t.me/ASDiscussiongroup ).

Yoshlarning qo‘ng‘iroqlarga javob beruvchi yagona 1093 «Ishonch telefoni” orqali tushayotgan murojaatlar 24/7 ish tartibida ishonch raqami masʼul xodimlari tomonidan qabul qilinadi.

Arizalar va shikoyatlar Yoshlar ishlari agentligining hududiy boshqarmalari tomonidan tushgan kundan boshlab bir oygacha muddatda ko‘rib chiqiladi, qo‘shimcha o‘rganish va tekshirishni talab qilmaydigan arizalar va shikoyatlar esa o‘n besh kundan kechikmay ko‘rib chiqiladi.

Arizalar yoki shikoyatlarni ko‘rib chiqish uchun qo‘shimcha tekshirish o‘tkazish, qo‘shimcha materiallarni talab qilish yoxud boshqa choralarni ko‘rish zarur bo‘lgan hollarda arizalar yoki shikoyatlarni ko‘rib chiqish muddatlari Yoshlar ishlari agentligining hududiy boshqarmalari rahbari tomonidan istisno tariqasida, biroq bu haqda ariza bergan yoki shikoyat qilgan shaxsga xabar qilingan holda bir oydan ortiq bo‘lmagan muddatga uzaytirilishi mumkin.