Poytaxtimizning Mirobod tumanida joylashgan 1-sonli bolalar va oʻsmirlar sport maktabi bazasida fijital sport oʻyinlari boʻyicha Toshkent shahar bosqichi boʻlib oʻtdi
2024-10-09 12:20:00 / Yangiliklar
Elektron sport va jismoniy faoliyatni birlashtirgan noyob tadbir respublikamizning barcha hududlarida jadvalga muvofiq uchta qiziqarli yoʻnalish boʻyicha oʻtkaziladi:
Fijital futbol (FIFA 24 Futbol 2x2) — virtual va haqiqiy maydonlarda kim eng yaxshi ekanligini tekshirib koʻramiz!
Fijital-basketbol (3x3 YEA) — oʻyinda ham, haqiqiy maydonda ham oʻz mahoratingizni koʻrsating!
Fijital-raqs (Just Dance) — keling, raqsga tushamiz va gʻalaba qozonamiz!
Ushbu shior ostida yoshlar uchun yangicha sport musobaqalari kuchli hayajon va adrenalindan tashqari, ishtirokchilarni har bir yoʻnalish boʻyicha gʻolib va sovrindorlar uchun ajoyib sovrinlar ham kutmoqda!
Bugunning oʻzidayoq, Toshkent shahar bosqichi gʻolib va sovrindorlari aniq boʻldi. Fijital futbol (FIFA 24 Futbol 2x2) boʻyicha 1-oʻrinni “Unwanted boys” jamoasi, 2-oʻrinni “Mirobod” jamoasi hamda 3-oʻrinni “Novza” jamoasi qoʻlga kiritdi.
Fijital-basketbol (3x3 YEA) boʻyicha 1-oʻrinni “Sport oʻyinlari boʻyicha IBOʻSMning “Siyovush-1” jamoasi, 2-oʻrinni “Sport oʻyinlari boʻyicha IBOʻSMning “Siyovush-2” jamoasi hamda 3-oʻrinni Yashnobod tumani 1-son sport maktabining “Yashnobod” jamoasi egalladi.
Fijital-raqs (Just Dance) boʻyicha Stella Mkrticheva va Darya Shadrina gʻoliblik shohsupasining eng yuqori pogʻonasidan oʻrin egalladi. Keyingi oʻrinlar Darina Baxtiozina va Rinata Yamoldinova juftligiga hamda Lolita Volkova va Sogdiana Abduxalikovalarga nasib etdi.
Eslatib oʻtamiz, musobaqalar yurtimizning barcha hududlarida joriy yilning oktyabr-noyabr oylarida boʻlib oʻtishi rejalashtirilgan. Barcha hududiy musobaqalarning gʻoliblari respublika bosqichida ishtirok etish huquqini qoʻlga kiritadilar. Respublika final bosqichi esa joriy yilning 28-30-noyabr kunlari oʻtkazilishi belgilangan.