O’zbekiston Respublikasi Sport vazirligining Respublikadagi har bir tuman-shaharida bittadan sport maydonchasini ovoz berish yo'li bilan qurib berish bo'yicha tanlov loyihasi yuzasidan matbuot anjumani PRESS RELIZI
2024-05-10 10:30:00 / Press-relizlar
Maqsad: Mahallalarda sport infratuzilmasini bosqichma bosqich yaratish, sport obyektlarini qurishda aholi istaklarini inobatga olish
O‘tish joyi: O’zbekiston Respublikasi Sport vazirligi
Davomiyligi: 1 soat
Ishtirokchilar soni: 40 nafar
“Tashabbus.sport” platformasi O‘zbekiston Respublikasi Sport vazirligi mablag‘lari hisobidan barpo etiladigan sport maydonchalarining kamida 30 foizi mazkur elektron tizim orqali ushbu hududda yashovchi aholi tomonidan ovoz berish yo‘li bilan haqiqiy ehtiyojini aniqlash maqsadida tashkil etilgan.
Mazkur loyiha 2022-2023 yillarda vazirlik tomonidan mahallalarda sport infratuzilmasini rivojlantirishga qaratilgan islohotlarining yangi bosqichi demakdir.
Ma’lumki, aholini sog‘lom turmush tarziga keng jalb qilish hamda ommaviy sport ruxini shakllantirish eng avvalo jamiyatning kichik bo‘g‘inlari, ya’ni mahallalarda sport infratuzilmasini rivojlantirishni taqozo etadi.
Bu borada, qonunchilikda bosqichma-bosqich tegishli normativ-huquqiy hujjatlarning tasdiqlanishi islohotlarni tizimli yo‘lga qo‘yilishi uchun dasturi amal bo‘lib kelmoqda.
Xususan, O‘zbekiston Respublika Prezidentining 2021 yil 5 noyabrdagi “Yurish, yugurish, mini-futbol, badminton, stritbol va “Workout” sport turlarini yanada rivojlantirish chora-tadbirlari to‘g‘risida”gi
PQ–5282-son hamda 2022 yil 11 apreldagi “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari to‘g‘risida”gi PQ–201-son qarorlari tasdiqlandi.
Shuningdek, Davlatimiz rahbari tomonidan 2022 yil 20 dekabrdagi Oliy Majlis va O‘zbekiston xalqiga Murojaatnomasida “har bir mahalla o‘zining kutubxonasi, sport maydonchasiga ega bo‘lishi zarur” ekanligi ta’kidlandi.
O‘zbekiston Respublikasi Prezidentining 2023 yil 28 iyuldagi “Mahallalarda sport infratuzilmasini rivojlantirish va sport maydonchalaridan samarali foydalanishni tashkil etish chora-tadbirlari to‘g‘risida”gi PQ–245-son qarori bilan “Sport maydonchalarini 2030 yilga qadar tashkil qilishning umumiy parametrlari” tasdiqlandi.
Buning natijasida 2022-2023 yillar davomida jami 969 ta sport maydonchalari qurilib, mahalla aholisi ixtiyoriga topshirildi. Sport maydonchalarida energiya quvvatini tejovchi quyosh panelli batareyalari o‘rnatildi, atrofi metall panjara o‘rniga ipli himoya to‘rlari bilan o‘raldi va yer maydoniga qayta ishlangan shina mahsulotidan olingan rezina qoplamasi yotqizildi.
Ta’kidlash lozimki, infratuzilmasi nisbatan rivojlanmagan joylarda bunday sport ob’ektlari barpo etilayotganligi ommaviy sportni yanada rivojlanishiga, ayniqsa mahalla aholisining, xususan yoshlarning katta qiziqishi va xursandchiligiga sabab bo‘ldi. Aholi tomonidan o‘z mahallasi hududida sport maydonchasi barpo etilishi yuzasidan ko‘plab murojaatlar va tashabbuslar bildirildi.
Shuningdek, O‘zbekiston Respublikasi Prezidentining 2023 yil 7 apreldagi PQ–114-son qaroriga muvofiq, 2024 yildan boshlab Sport vazirligi mablag‘lari hisobidan barpo etiladigan sport obektlari va inshootlarining kamida 30 foizi “ERP Sport” yagona elektron boshqaruv tizimi orqali ushbu hududda yashovchi aholi tomonidan ovoz berish yo‘li bilan aniqlanishi ko‘zda tutilgan.
Yuqoridagi qaror ijrosini ta’minlash va ayniqsa aholining talab-istaklaridan kelib chiqqan holda “Tashabbus.sport” loyihasi ishlab chiqildi hamda Qoraqalpog‘iston Respublikasi, viloyatlar va Toshkent shahrida har bir tumanlarining (shahri) eng ko‘p ovoz to‘plagan bittadan mahallalarida jami 208 ta vorkaut-stritbol sport maydonchalari qurish rejalashtirildi.
Buning uchun, sport vazirining tegishli buyrug‘i bilan “Tashabbusli sport” elektron platformasi faoliyatini tashkil etish tartibi to‘g‘risidagi” nizom tasdiqlandi. Qoraqalpog‘iston Respublikasi Sport vazirligi, viloyatlar va Toshkent shahar sport boshqarmalari tomonidan har bir tumandan infratuzilmasi rivojlanmagan, eng olis hududlarda joylashgan mahallalardan 3 tadan kam bo‘lmagan taklif loyihalar ishlab chiqildi hamda yer maydonlarining lokatsiyasi, rasmi, o‘lchamlari va boshqa ma’lumotlari platformaga joylashtirildi.
Yangi loyihani jamoatchilikka tanishtirish va ovoz berishga jalb qilish maqsadida maxsus videorolik tayyorlandi va vazirlik rasmiy saytida e’lon qilindi.
“Tashabbus.sport” mahallalarda sport infratuzilmasini rivojlantirish va aholini ommaviy sportga jalb qilishni yangi bosqichi sifatida jamoatchilik tomonidan iliq kutib olinishiga hamda xalqimizga samarali xizmat qilishiga ishonamiz.