Yaponiyaning Xirosima shahrida Namangan viloyati hokimligi, Balcom kompaniyasi va O‘zbekistonning Yaponiyadagi elchixonasi hamkorligida o‘zbek milliy taomlari restorani hamda Namangan viloyatining rasmiy "Savdo uyi" ochildi.
2025-11-28 15:20:00 / Yangiliklar
Ochilish marosimida Namangan viloyati hokimi Shavkatjon Abdurazzoqov boshchiligidagi delegatsiya ishtirok etdi.
Yangi restoran Yapon jamoatchiligiga o‘zbek milliy oshxonasining boy va betakror taʼmlarini tanitishni maqsad qiladi. Mehmonlarga palov, somsa, sho‘rva, lag‘mon, qozon-kabob va boshqa anʼanaviy taomlarni o‘zining asl texnologiyasida tayyorlangan holda taqdim etish rejalashtirilgan.
"Savdo uyi" esa Namanganda ishlab chiqarilayotgan sanoat va qishloq xo‘jaligi mahsulotlari, tekstil, hunarmandchilik va gastronomiya brendlari namoyishida muhim markaz bo‘lib, Yapon bozoriga mahalliy mahsulotlarni yetkazib berish, yangi eksport yo‘nalishlarini yo‘lga qo‘yish, tadbirkorlar o‘rtasida to‘g‘ridan-to‘g‘ri hamkorlikni rivojlantirish uchun doimiy platforma vazifasini bajaradi.
Ushbu loyihalarning amalga oshirilishi Namangan viloyati brendini Yaponiya bozorida targ‘ib qilish, turizm oqimini oshirish va ikki davlat o‘rtasidagi iqtisodiy hamkorlikni yangi bosqichga olib chiqishga xizmat qiladi.