1. Kimlar ushbu Jamg'armadan moliyaviy yordam (subsidiya, ssuda, grant) olishi mumkin?

Javob: Jamg'armaning moliyaviy yordamlari asosan "Ijtimoiy reyestr"ga kiritilgan oila a'zolariga, ishsiz fuqarolarga, o'zini o'zi band qilmoqchi bo'lganlarga, hunarmandlarga va ehtiyojmand aholini kasanachi sifatida ishga qabul qilgan tadbirkorlik subyektlariga ajratiladi. Bundan tashqari, pilla yetishtiruvchilar (kasanachilar), shuningdek, ozodlikdan mahrum etish jazosini o'tab bo'lgan fuqarolar ham o'z biznesini boshlash va tadbirkorlikka jalb etilishi uchun maxsus yordam olishlari mumkin.

2. Jamg'armadan yordam olish uchun qayerga va qanday murojaat qilish kerak?

Javob: Talabgorlar moliyaviy ko'mak (subsidiya, grant yoki ssuda) olish uchun o'zining doimiy yashash manzilidagi mahalladagi hokim yordamchisiga bevosita murojaat qilishlari yoxud Yagona interaktiv davlat xizmatlari portali (my.gov.uz) va "Onlayn mahalla" elektron platformasi orqali elektron tarzda ariza yuborishlari mumkin. Murojaatda qanday turdagi yordam kerakligi va shaxsga oid ma'lumotlar to'liq ko'rsatilishi lozim.

3. Murojaat qilingandan so'ng ariza qancha vaqtda va kim tomonidan ko'rib chiqiladi?

Javob: Murojaat kelib tushgach, hokim yordamchisi uni uch ish kunida "Onlayn mahalla" platformasi orqali skoring tizimidan o'tkazadi. Agar skoring natijasi ijobiy bo'lsa, "Mahalla yettiligi" murojaatni uch ish kunida joyiga chiqqan holda o'rganib chiqadi. Shundan so'ng "Mahalla yettiligi"ning har bir a'zosi elektron imzo orqali ovoz beradi va ko'pchilik ovozi bilan subsidiya, ssuda yoki grant ajratish yoxud rad etish to'g'risida uzil-kesil kollegial qaror qabul qilinadi.

4. O'z biznesini boshlayotgan ishsiz fuqarolar uchun bino ijarasi bo'yicha qanday yordam bor?

Javob: Tadbirkorlik faoliyatini boshlayotgan va "Ijtimoiy reyestr"da turgan oilaning ishsiz a'zolariga tadbirkorlik subyekti sifatida ro'yxatdan o'tgandan so'ng, dastlabki 3 oy mobaynida olingan bino va inshootning ijara to'lovini to'lash uchun bazaviy hisoblash miqdorining 10 baravarigacha miqdorda subsidiya (qaytarib berilmaydigan mablag') ajratiladi. Ushbu mablag' to'g'ridan-to'g'ri ijaraga beruvchining hisob raqamiga o'tkazib beriladi.

5. Qishloq xo'jaligi, dehqonchilik yoki biznes uskunalari xarid qilish uchun qarz (ssuda) qanday shartlarda beriladi?

Javob: "Ijtimoiy reyestr"ga kiritilgan oila a'zolariga o'z faoliyatini boshlashi uchun zarur bo'lgan asbob-uskuna va mehnat qurollari xarid qilishga 6 oydan 3 yilgacha bo'lgan muddatga bazaviy hisoblash miqdorining 50 baravarigacha foizsiz ssuda beriladi. Dehqonchilik va bog'dorchilik tashkil qilish maqsadida (suv quduqlari qazish, nasos xarid qilish, tomchilatib sug'orish va elektr tarmog'i tortish uchun) esa 6 oylik imtiyozli davr bilan 5 yilgacha muddatga bazaviy hisoblash miqdorining 200 baravarigacha miqdorda foizsiz ssudalar ajratilishi ko'zda tutilgan.

6. Hunarmandlar shogird tayyorlashi yoki mahsulotlarini internet orqali sotishi uchun qanday imtiyozlar mavjud?

Javob: "Usta-shogird" an'anasi asosida yoshlarga hunar o'rgatayotgan hunarmandlarga xomashyo sotib olish va shogirdlarini ish haqi bilan ta'minlash maqsadida har bir shogird uchun 6 oy davomida (5 nafargacha shogird uchun) hudud toifasiga qarab bazaviy hisoblash miqdorining 2 baravaridan 5 baravarigacha miqdorda subsidiya to'lanadi. Shuningdek, ustalarga o'z internet saytlarini yaratish, mahsulotlarini xalqaro elektron savdo maydonchalariga chiqarish va reklama qilish xarajatlarining hudud toifasiga qarab 50 foizdan 75 foizigacha (bazaviy hisoblash miqdorining 25-30 baravarigacha) qismini qoplash uchun ham subsidiya ajratiladi.