Toshkentda Xalqaro Kosmonavtika kuni munosabati bilan forum bo‘lib o‘tdi
2024-04-19 12:15:00 / Yangiliklar
18-aprel kuni “O‘zbekkosmos” agentligi boshchiligida Toshkent shahar Planetariysi bilan hamkorlikda Xalqaro Kosmonavtika kuni munosabati bilan forum bo‘lib o‘tdi. Forumda “O‘zbekkosmos” agentligi, Toshkent shahar Planetariysi rahbar-xodimlari, shuningdek, 50 nafarga yaqin talabalar va o‘quvchi-yoshlar ishtirok etdilar.
Forum ochilishida madaniyat vazirining birinchi o‘rinbosari Avazxon Tadjixanov ishtirok etdi.
“O‘ylaymanki, ushbu forum koinot sirlariga qiziquvchi, osmon jismlari bo‘lmish planetalar va ularning yo‘ldoshlari, gallaktikalar va yulduzlar hayotini o‘rganishda kelajagimiz egalari bo‘lmish bolajonlarga kosmonavtikaga bo‘lgan qiziqishlarini oshirish bilan birga, katta orzular sari intilishlariga turtki bo‘ladi albatta.” – dedi o‘z nutqi davomida madaniyat vazirining birinchi o‘rinbosari Avazxon Tadjixanov.
Forumning asosiy qismida NASA astronavti va Xalqaro kosmik stansiya qo‘mondoni sifatida 40 yildan ortiq aviatsiya va kosmik tajribaga ega bo‘lgan Maykl Lopes-Alegriya bilan onlayn Zoom orqali “Yulduzli suhbat: astronavt bilan kosmik sarguzashtlar” mavzusida uchrashuv tashkil etildi. Unda ishtirokchilar kosmonavtika sohasida o‘zlarini qiziqtirgan savollarga javob olish imkoniga ega bo‘lishdi.
Forum davomida Planetariy binosida “O‘zbekkosmos” agentligi tomonidan kosmik suratlar ko‘rgazmasi bo‘lib o‘tdi, u yerda kosmosdan olingan turli ekslyuziv tasvirlar namoyish etildi.
Shuningdek, P.Benkov nomidagi respublika ixtisoslashtirilgan rassomlik maktabi o‘quvchi-yoshlari o‘z ijodlari bilan ishtirok etdilar. Planetariy binosida “Astranomiyaning buyuk asoschilaridan” nomli ko‘rgazmali burchakning tantanali ravishda ochilish marosimi bo‘lib o‘tdi. Shundan so‘ng, “Koinot tubiga” nomli dastur namoyish etildi.