O‘zbekiston Respublikasi Madaniyat vazirligi

Kuni kecha Yunus Rajabiy nomidagi O‘zMMSIda O‘zbekiston va Tojikiston xalq artisti, ustoz san’atkor Matluba Dadaboyeva (Mavluda Xalilova)ning 70 yillik yubileyiga bag‘ishlangan tantanali tadbir bo‘lib o‘tdi.

Tadbirda madaniyat vazirining birinchi o‘rinbosari Avazxon Tadjixanov ishtirok etib, O‘zbekiston Respublikasi madaniyat vaziri Ozodbek Nazarbekovning tabrigini o‘qib eshittirdi.

Tabrikda shunday deyilgan edi: "O‘zbekiston Respublikasi Madaniyat vazirligi va shaxsan o‘z nomimdan Sizni 70 yoshingiz bilan chin qalbimdan muborakbod etib, eng ezgu va samimiy tilaklarimni yo‘llayman.

Ko‘p yillik mehnat faoliyatingiz davomida boy bilim va tajribangizga tayanib, madaniyat va san’at sohasida malakali kadrlar tayyorlash, xususan, milliy qo‘shiqchilik san’ati maktabini rivojlantirish, iste’dodli yoshlarni izlab topish va ularni qo‘llab-quvvatlash borasidagi sa’y-harakatlaringizni e’tirof etish katta mamnuniyat bag‘ishlaydi.

Sizning sohada bosib o‘tgan yo‘lingiz, fidoyiligingiz va tashabbuskorligingiz ibrat qilib ko‘rsatishga arziydi. Jumladan, Yunus Rajabiy nomidagi O‘zbek milliy musiqa san’ati institutidagi faoliyatingiz davomida yoshlarga O‘zbek milliy qo‘shiqchiligi sir-asrorlarini o‘rgatib kelayotganligingiz, ta’lim va tarbiya berishdagi tashabbuskorligingiz tahsinga loyiqdir.

Siz ta’lim berayotgan ta’lim muassasasi talabalari “An’anaviy xonandalik” yo‘nalishi bo‘yicha O‘zbekiston Respublikasi Prezidentining yosh iste’dodlar uchun “Nihol”, Madaniyat vazirligi tomonidan ta’sis etilgan “E’tirof” va “Ehtirom” mukofotlarini juda ko‘p bora qo‘lga kiritib, yuzlab xalqaro ko‘rik-tanlov, festivallarning laureatlari, sovrindorlari bo‘lib kelishmoqda.

Ayni paytda, o‘zbek milliy qo‘shiqchilik san’atining rivojlanishiga, ravnaqiga munosib hissa qo‘shib kelayotgan jonkuyar, talabchan pedagog va professor-murabbiy sifatida, yuksak malakali mutaxassislarni tayyorlash borasidagi samarali faoliyatingiz amaliy natijalarini ko‘rsatmoqda.

Sizni qutlug‘ yoshingiz bilan yana bir bor tabriklab, ushbu quvonchli kunda Sizga sihat-salomatlik, uzoq umr, xonadoningizga tinchlik-xotirjamlik, fayz-baraka, mas’uliyatli va ilm yo‘lidagi faoliyatingizda ulkan muvaffaqiyatlar tilayman."

Shuningdek, Matluba Dadaboyeva (Mavluda Xalilova)ni madaniyat vazirining birinchi o‘rinbosari Avazxon Tadjixanov ham ushbu ulug‘ yosh bilan samimiy tabriklab, san’at sohasidagi ko‘p yillik fidokorona mehnati uchun minnatdorchilik bildirdi.

Tadbirda institutning ustoz va talabalari, san’at ahli hamda mehmonlar ishtirok etib, ustoz san’atkorning boy ijodiy faoliyati, milliy musiqamiz rivojiga qo‘shgan beqiyos hissasi yuksak qadrlanib, iliq tilaklar bildirildi.

Matluba Dadaboyeva (Mavluda Xalilova) o‘zining betakror ovozi, o‘ziga xos ijro uslubi va yuksak mahorati bilan san’at ixlosmandlari qalbidan chuqur o‘rin egallagan. Ustozning yirik sahna ijodiyoti, milliy musiqamiz rivojiga qo‘shgan hissalari va shogirdlar tarbiyasidagi mehnatlari alohida e’tiborga loyiqdir.