O‘zbekiston Respublikasi Madaniyat vazirligi

Madaniyat vazirligida jamiyat hayoti, yoshlar tarbiyasi, madaniyat va ma’naviyatni rivojlantirishga qaratilgan Jamoatchilik kengashi yig‘ilishi bo‘lib o‘tdi. Unda, madaniyat vaziri Ozodbek Nazarbekov, vazirlik markaziy apparati vakillari hamda Jamoatchilik kengashi vakillari ishtirok etishdi.

Yig‘ilishda san’at va ijodkorlikni qo‘llab-quvvatlash, zamonaviy kinoteatrlar tashkil etish, ma’naviyat va ideologiyani chuqur o‘rganadigan markaz ochish kabi tashabbuslar ilgari surildi. Shuningdek, televideniye dasturlarida maishiy mavzulardan voz kechib, yoshlar va xususan ayollarning faolligini oshirish zarurligi ta’kidlandi.

Yig‘ilish davomida yoshlar orasida jinoyatchilik va giyohvandlik masalalari dolzarb ekanini ta’kidlandi. Shu munosabat bilan ijtimoiy roliklarni ko‘paytirish, OAVlarda targ‘ibotni kuchaytirish, seminarlar tashkil etish va advokatlar ishtirokida yoshlarni huquqiy bilimlar bilan tanishtirish zarurligi bildirildi.

Kengash a’zosi bo‘lgan shoir Bobur Bobomurod - ijodkorlarni qo‘llab-quvvatlash, vatanparvarlik ruhidagi telekanal (“Vatan”) tashkil etish va ko‘rsatuvlarni kengaytirish lozimligini qayd etdi.

Yana bir kengash a’zosi Faxriddin Karimov yuqoridagi fikrlarni tasdiqlab quyidagilarni qo‘shimcha qildi: esa barcha targ‘ibot ishlari madaniyat kuchi orqali olib borilishi kerakligini, buning uchun “Umummilliy madaniy yuksalish konsepsiyasi” ishlab chiqilishi zarurligini taklif qildi.

Jamoatchilik kengashi a’zosi Botirjon Ergashev esa kengash mohiyati haqida so‘z yuritib, bu jarayonga barcha qatlamlarni jalb qilish va kengashning Telegram guruhini tashkil etish zarurligini bildirdi.

Yig‘ilishda kengash a’zosi sifatida qatnashgan Olimjon Xudoynazarov  QVZ jamoalari orqali ommalashayotgan trendlarni inobatga olish, nasihatbozlikdan ko‘ra yoshlar tili bilan ishlash va maxsus vakil tayinlashni taklif qildi.

Yuqoridagi fikrlarga qo‘shimcha qilish uchun kengash a’zosi Muhammadali Eshonqulov esa tarixni chuqur o‘rganish yoshlar ongida milliy g‘ururni uyg‘otishini, bu esa madaniyatni rivojlantirishda muhim o‘rin tutishini ta’kidladi.

Shuningdek, jamoatchilik kengashi yig‘ilishi davomida “Media va madaniyatni rivojlantirish”, “Ayollar va ijtimoiy mavzular” kabi masalalar yuzasidan ham takliflar ilgari surildi.

Yig‘ilish davomida jamoatchilik kengashi a’zolari Munojot Yo‘lchiyeva, Rustam Sa’diyev, Jenisbek Piyazov, Bobur Yo‘ldoshev,  E’tibor Sultonova hamda Gavhar Zokirovalar ham yuqorida qayd etilgan mavzular yuzasidan o‘z takliflarini va fikrlarini bildirishdi.

“Hurmatli jamoatchilik kengashi yig‘ilishi qatnashchilari! Bugun biz Sizlarga joriy yil davomida sohada amalga oshirilgan ishlar haqida qisqacha ma’lumot taqdim etdik. O‘z navbatida, vazirlik huzuridagi jamoatchilik kengashining asosiy vazifalaridan biri, Sizlar bilan birgalikda muloqot qilish, vazirlikning nodavlat notijorat tashkilotlari, ommaviy axborot vositalari va fuqarolik jamiyatining boshqa institutlari bilan samarali hamkorligini ta’minlash uchun vazirlik va fuqarolar bilan bog‘lab turadigan “ko‘prik” rolini bajarishi lozim. Yana bir muhim jihat, jamoatchilik kengashining doimiy faoliyat olib borishi vazirligimiz faoliyatining ochiqligini ta’minlash hamda amalga oshirilayotgan vazifalarimizning samaradorligini tahlil etgan holda keng jamoatchilikka targ‘ib etishdir. Yuqoridagilardan kelib chiqqan holda Sizlar vazirligimiz faoliyatida muhim bo‘g‘in hisoblanasiz va mamlakatimiz hayotining ajralmas qismi bo‘lgan madaniyat va san’at sohasini yanada rivojlantirish borasidagi hali o‘z yechimini kutayotgan masalalar yechimida faol bo‘lasiz degan umiddaman” – dedi vazir Ozodbek Nazarbekov.

Yig‘ilish yakunida barcha taklif va tashabbuslar jamiyatda madaniyat va ma’naviyatni yuksaltirish, yoshlarni sog‘lom ruhda tarbiyalash, vatanparvarlik g‘oyalarini mustahkamlashga qaratilgan yagona maqsad sari yo‘naltirildi. Eng muhim vazifa sifatida yo‘l xaritasini ishlab chiqish, aniq konsepsiyalarni tayyorlash va tashabbuskorlarni jalb qilish belgilandi. Shu asosda kengash faoliyati tizimli ravishda yo‘lga qo‘yilishi belgilandi.