Kuni kecha Toshkent shahrida O‘zbekiston xalq hofizlari Jo‘raxon Sultonov va Ma’murjon Uzoqov nomidagi yosh ijrochilar respublika televizion ko‘rik-tanlovi bo‘lib o‘tdi.

Mazkur tanlov O‘zbekiston Respublikasi Madaniyat vazirligi va O‘zbek milliy maqom san’ati markazi tomonidan tashkil etilib, yosh iste’dodlarni kashf qilish, ularni qo‘llab-quvvatlash hamda milliy maqom san’atini keng targ‘ib qilishni maqsad qilgan.

Tanlovda 18–30-yoshdagi ijodkorlar qatnashib, ustoz hofizlar ijodidan namunalar hamda Toshkent-Farg‘ona maqom yo‘llaridan asarlarni ijro etishdi.

Tanlovning yakuniy bosqichda 70 dan ziyod yoshlar o‘z imkoniyatlarini sinab ko‘rishdi. Joriy yilning 26-sentyabr kuni Muqimiy nomidagi O‘zbekiston davlat akademik musiqali teatrida tantanali taqdirlash marosimi bo‘lib o‘tdi.

Quyidagilar g‘oliblikka munosib ko‘rildi:

I o‘rin - Toshkent shahridan hamnafaslikda qatnashgan Quvondiqov Mirshod va Temirov Asqar;

II o‘rin - Farg‘ona viloyatidan tashrif buyurgan Abdujabborova Intizorxon;

III o‘rin - Surxondaryo viloyatidan tashrif buyurgan Ibrohimov Samariddin.

Tantanali taqdirlash marosimida O‘zbekiston Respublikasi madaniyat vazirining birinchi o‘rinbosari Bahodir Ahmedov ishtirok etdi va g‘oliblarni taqdirladi.