O‘zbekiston Respublikasi Madaniyat vazirligi

29-mart kuni O‘zbekiston davlat musiqali komediya teatrida “Yoshlik bahori” yosh opera ijrochilari festival g‘oliblarini taqdirlash marosimi va gala-konsert bo‘lib o’tdi.

Festivalni tashkil etish va o‘tkazishdan ko‘zlangan asosiy maqsad jahon san’ati durdonalaridan biri hisoblangan opera ijrochilik san’atini yanada rivojlantirish, sohada ijod qilayotgan iqtidorli yoshlarni izlab topish va ularning intilishlarini qo‘llab-quvvatlash, opera ijrochiligi san’ati hamda madaniyatini yanada yuksaltirish, mohir ijrochilarni kashf etish, opera ijrochiligini yuksak darajaga ko‘tarish, iqtidorli yoshlarni dunyo sahnalariga olib chiqish va ijodlarini targ‘ib etishlari uchun keng maydon yaratishdir.

Festival opera ijrochiligi bo‘yicha 17 yoshdan 25 yoshgacha boʻlgan faqat professional ijrochilar oʻrtasida ikkita yo‘nalish bo‘yicha:

– Birinchi yoʻnalish — hududlarda faoliyat yuritayotgan badiiy jamoalar, madaniyat boʻlimlari, taʼlim muassasalari hamda professional erkin ijodkorlar orasida;

– Ikkinchi yoʻnalish — Toshkent shahri hamda Qoraqalpog‘iston Respublikasida joylashgan badiiy jamoalar, madaniyat boʻlimlari, taʼlim muassasalari va professional erkin ijodkorlar orasida oʻtkazildi.

Har bir yoʻnalish alohida baholandi hamda yoʻnalishlar boʻyicha nominatsiya g‘oliblari aniqlandi.

Festivalning birinchi saralash bosqichlari joriy yilning 11-15-mart kunlari Qoraqalpog‘iston Respublikasi, viloyatlar hamda Toshkent shahri bo‘ylab o‘tkazilgan bo‘lib, unda jami 150 nafardan ziyod yosh ijodkorlar ishtirok etdilar.
Ular orasidan eng yuqori ball to‘plagan g‘oliblari Toshkent shahrida o‘tkazilgan Respublika bosqichida ishtirok etish yo‘llanmasiga ega bo‘ldilar. Final bosqichida jami
38 nafar yosh opera xonandalari qatnashdi.

Festival ishtirokchilari quyidagi nominatsiyalar bo‘yicha saralab olinib, g‘oliblar aniqlandi.

– Eng yaxshi o‘zbek operasi ijrochisi – Abduqodirov Muhammad-Yusuf Rustambek oʻgʻli;

– Eng yaxshi jahon operasi ijrochisi – Qidirbayev Baxit Baxtiyar o‘g‘li

– Eng yaxshi ayol ovozi – Keunimjayeva Dilnaz Jenisbay qizi;

– Eng yaxshi erkak ovozi – Aljanov Abat Po‘lat o‘g‘li;

– Eng yosh ishtirokchi – Raxmatilloyev Kamran Nodir o‘g‘li;

– Tomoshabin eʼtirofi – Alimov Doniyor Rasuljon o‘g‘li.

Festival ilk bora teleloyiha shaklida O‘zbekiston milily teleradiokompaniyasining “Madaniyat va ma’rifat” telekanali bilan hamkorlikda o‘tkazildi.

Festival ishtirokchilarini opera san’atining taniqli ijodkorlari, ijrochilar, madaniyat
va san’at sohasining yorqin namoyondalari, shuningdek, mutaxassislardan iborat bo‘lgan Hakamlar hay’ati baholab bordi.

Ma’lumot uchun, O‘zbekiston Respublikasi Prezidentining 2023-yil 25-dekabrdagi PQ – 406-son qarorida belgilangan vasifalar ijrosini ta’minlash maqsadida O‘zbekiston Respublikasi Madaniyat vazirligi tomonidan “Yoshlik bahori” yosh opera ijrochilari festivali o‘tkazildi.