O‘zbekiston va Saudiya Arabistoni o‘rtasidagi madaniy hamkorlik aloqalari rivojlanmoqda
2025-09-09 14:00:00 / Yangiliklar
Kuni kecha Madaniyat vazirligida O‘zbekiston madaniyat vaziri Ozodbek Nazarbekov hamda Saudiya Arabistoni Podshohligining O‘zbekiston Respublikasidagi Favqulodda va Muxtor Elchisi Yusuf Soleh Alg‘ahrah Al-Utaybiy o‘rtasida hamkorlik uchrashuvi bo‘lib o‘tdi.
O‘zbekiston va Saudiya Arabistoni o‘rtasidagi madaniy hamkorlik so‘nggi yillarda izchil rivojlanib bormoqda. Bu aloqalar ikki mamlakatning tarixiy, diniy va madaniy jihatdan yaqinligiga asoslangan bo‘lib, ko‘plab yo‘nalishlarni qamrab oladi.
Uchrashuv davomida ikki davlat o‘rtasidagi madaniy hamkorlik aloqalari haqida fikr yuritildi.
Shuningdek, O‘zbekiston va Saudiya Arabistoni o‘rtasidagi madaniy hamkorlikni yanada rivojlantirish masalalari, jumladan, 2025-yilda bo‘lib o‘tadigan Riyod kitob yarmarkasida O‘zbekistonning munosib ishtirokini ta’minlash masalasi; YUNESKOning 43-sessiyasi doirasida Saudiya Arabistoni Madaniyat vazirining ishtiroki to‘g‘risida; ikki davlat Madaniyat vazirliklari o‘rtasida hamkorlik to‘g‘risidagi hujjat loyihasi tayyorlangani hamda mazkur hujjatni oliy darajadagi tashriflar doirasida imzolash muhokama etildi.
Uchrashuv yakunida bayon etilgan masalalar O‘zbekiston va Saudiya Arabistoni o‘rtasidagi madaniy hamkorlikni yangi bosqichga ko‘tarishga xizmat qilishiga ishonch bildirildi. Uchrashuv samimiy va do‘stona ruhda o‘tdi.