Bugun, 8-sentyabr kuni poytaxtdagi Turkiston san’at saroyida O‘zbekiston xalq artisti Bahodir Yo‘ldoshev tavalludining 80 yilligiga bag‘ishlangan “Sahna – mening hayotim” nomli adabiy-ma’rifiy xotira kechasi bo‘lib o‘tdi.

Xotira kechasida O‘zbekiston Respublikasi Prezidentining maslahatchisi Xayriddin Sultonov, Madaniyat vaziri Ozodbek Nazarbekov, madaniyat va san’at sohasi vakillari, rejissyor Bahodir Yo‘ldoshevning yaqinlari, shogirdlari, shoir va yozuvchilar, talabalar hamda OAV vakillari ishtirok etishdi.

Tadbir avvalida O‘zbekiston Respublikasi Prezidentining maslahatchisi Xayriddin Sultonov nutq qilib, adabiy-ma’rifiy tadbir va xotira kechasini ochib berdi.

Mazkur xotira kechasi nafaqat Bahodir Yo‘ldoshevni yodga olish, balki uning san’atga, o‘zbek milliy teatriga qo‘shgan betakror hissasi yana bir bor namoyon etildi. Uning hayoti va ijodi uzoq yillar davomida teatr maydonida nafaqat spektakllar yaratish bilan, balki milliy san’atni yangi bosqichga ko‘tarish, yosh ijodkorlarni tarbiyalash va millat madaniyatini targ‘ib etish bilan bog‘liqligi ta’kidlandi. Shuningdek, kecha davomida Bahodir Yo‘ldoshevning ijodiy yo‘li nafaqat milliy dramaturgiyani boyitishda, balki zamonaviy teatr uslubini mukammallashtirishda ham o‘zining munosib hissasini qo‘shganligi bilan alohida o‘rin tutganligi e'tirof etildi.

“Bahodir Yo‘ldoshev faqat katta teatr sahnalaridagina emas, balki yosh ijodkorlar bilan ham faol ishladi. Uning “Diydor” teatr-studiyasidagi faoliyati ko‘plab yoshlarni teatr san’atiga kasbiy tayyorlash, ularning iste’dodini ochishda beqiyos ahamiyat kasb etdi.

Yosh rejissyorlar va aktyorlar u bilan hamkorlikda ko‘plab spektakllarni muvaffaqiyatli sahnalashtirishdi, bu ularning professionallik darajasini sezilarli darajada oshirdi. Bahodir Yo‘ldoshevning har bir spektakli – bu uning hissiyotlari, xalqning orzu-umidlari va milliy ruhning yorug‘ tasviri bo‘lib, Ustoz bizga san’atga bo‘lgan muhabbat va sadoqat, mehnatsevarlikka intilishni o‘rgatdi. Har bir spektakl – ustozning hayot tajribasi, bilim va ishtiyoqi ifodasi edi. Uning sahnalashtirgan spektakllari nafaqat mahalliy, balki xalqaro maydonda ham e’tirof etildi. AQSH, Fransiya, Rossiya, Italiya kabi ko‘plab boshqa davlatlardagi teatr festivallarida u o‘zbek teatrining obro‘yini yuksaltirishda muhim rol o‘ynadi” – dedi vazir Ozodbek Nazarbekov.

Adabiy-ma’rifiy xotira kechasida “O‘zbekfilm” studiyasida suratga olingan Bahodir Yo‘ldoshev hayoti va ijodiga bag‘ishlangan hujjatli filmdan parcha, “Kelinlar qo‘zg‘aloni” spektakldan parcha, “Iskandar” spektaklidan parcha, “Nodirabegim” spektaklidan parcha, “Olovli yo‘llar” filmdan parcha, “Diydor” teatr studiyasi “Arshin mal alan” spektaklidan parcha namoyish etilib, taniqli san'atkorlarning kuy-qo‘shiqlari yangradi.

Ma’lumot o‘rnida, O‘zbekiston Respublikasi Vazirlar Mahkamasining “2025-yilda ilm-fan, adabiyot madaniyat va san’at, diniy ma’rifiy sohalari atoqli namoyandalarining tavallud sanalarini munosib nishonlash hamda ularning faoliyatini keng targ‘ib etish to‘g‘risida” 2025-yil 13-fevraldagi 72-F-son farmoyishi ilovasining 47-bandida O‘zbekiston xalq artisti Bahodir Yo‘ldoshev tavalludining 80 yilligini keng nishonlash belgilangan.