Xabaringiz bor ayni kunlarda O‘zbekiston Respublikasi Prezidenti Shavkat Mirziyoyev amaliy tashrif bilan Xitoyda bo‘lib turibdi. 

Shunga ko‘ra, O‘zbekiston Respublikasi madaniyat vaziri Ozodbek Nazarbekov xizmat safari bilan Xitoy Xalq Respublikasida bo‘ldi.

Tashrif doirasida, O‘zbekiston Respublikasi madaniyat vaziri Ozodbek Nazarbekov hamda Xitoy Xalq Respublikasi madaniyat va turizm vaziri Sun Yeli bilan ikkitomonlama hamkorlik uchrashuvi bo‘lib o‘tdi.

Mazkur uchrashuv davomida vazir Ozodbek Nazarbekov so‘nggi yillarda mamlakatlarimiz rahbarlari tashabbusi bilan madaniy sohada hamkorlik izchil rivojlanayotganligi natijasida ikki davlat o‘rtasida madaniy almashinuv tobora kengayib borayotganligini alohida ta’kidladi. Ikki davlat vazirlarining doimiy uchrashuvlari, do‘stona va o‘zaro manfaatli munosabatlarning yaqqol ifodasi ekanligi qayd etildi.

Xususan, joriy yilning 7-iyul kuni Xitoyning Tsingdao shahrida SHHTga a’zo davlatlarning madaniyat vazirlari uchrashuvi yuksak saviyada tashkil etilganligi va unda samarali ishlar amalga oshirilganligi alohida ma’lum qilindi.

Uchrashuv davomida O‘zbekiston Respublikasi Hukumatı va Xitoy Xalq Respublikasi Hukumatı o‘rtasida madaniyat markazlarini tashkil etish to‘g‘risidagi Bitim imzolandi.

Ushbu Bitim tarixiy hujjat bo‘lib, bunday kelishuv ilk bor tuzilayotganligini inobatga olgan holda, ikki davlat madaniy aloqalarining yangi bosqichga ko‘tarilishiga zamin yaratishi kutilmoqda.

Xitoy vaziri Sun Yeli ham ikki davlat o‘rtasidagi munosabatlar iqtisodiy, ijtimoiy, ta’lim yo‘nalishlari bilan bir qatorda madaniyat sohasida ham tez suratlarda rivojlanib borayotganligini ma’lum qildi.

Xususan, Xitoy vaziri 2024-yilda Pekin shahrida tashkil etilgan “O‘zbekiston madaniyati kunlari” tadbirlarini yuqori baholadi hamda mazkur tadbirlarni doimiy bo‘lishiga umid bildirib, joriy yilda O‘zbekistonda “Xitoy madaniyati kunlari” tadbirlarini tashkil etish taklifini bildirdi.

O‘z o‘rnida, vazir Ozodbek Nazarbekov ushbu taklifni to‘liq qo‘llab-quvvatlashini hamda O‘zbekiston tomonidan barcha amaliy yordam ko‘rsatilishini bildirdi.

Uchrashuv davomida tomonlar madaniyat sohasidagi hamkorlikka oid takliflar, qo‘shma madaniy loyihalar, madaniy ta’lim, investitsiya yo‘nalishlaridagi takliflari bilan o‘rtoqlashdilar hamda mazkur takliflarni ijobiy ko‘rib chiqishga kelishib oldilar.