Xitoy konservatoriyasining bir qator professor-o‘qituvchilari poytaxtdagi Yunus Rajabiy nomidagi O‘zbek milliy musiqa san’ati institutida bo‘lishdi
2025-08-05 11:55:00 / Yangiliklar
Kuni kecha Yunus Rajabiy nomidagi O‘zbek milliy musiqa san’ati institutiga Xitoy konservatoriyasining bir qator professor-o‘qituvchilari tashrif buyurdi.
Tashrif davomida “Yoshlar masalalari va ma’naviy-ma’rifiy ishlar” bo‘yicha birinchi prorektori Davlat Himmatov tomonidan institut tarixiy merosi, ta’lim tizimi, ilmiy salohiyati, ijodiy maktablari va hozirgi davrda olib borilayotgan islohotlar, Yunus Rajabiy muzeyi xususan, milliy musiqa merosiga doir ilmiy manbalar taqdim etildi. O‘z navbatida, xorijlik mehmonlar ham Xitoyning an’anaviy musiqasi, o‘qitish uslublari va global miqyosdagi yutuqlari haqida so‘zlab, tajriba almashdilar.
Shuningdek, suhbat davomida ikki qardosh xalqning surnay hamda qo‘shnay cholg‘u sozlari haqida o‘zaro fikr almashildi va cholg‘ularning tuzilishi, chalish texnikasi, ijro uslubi hamda marosimlardagi o‘rni borasida qiziqarli tahlillar yuritildi. O‘zMMSI professorlari tomonidan ijro etilgan surnay navolari xitoylik mehmonlarda katta taassurot qoldirib, o‘z navbatida surnay va unga o‘xshash milliy sozlar bilan bog‘liq tajriba va bilimlarini almashdi.
Kelgusi yillarda qardosh xalqlarning madaniy-ma’rifiy hamkorligini yanada mustahkamlash, talabalar va pedagoglar almashinuvi, qo‘shma ijodiy loyihalar, ilmiy konferensiyalar va konsert dasturlarini tashkil etish bo‘yicha kelishuvga erishildi.