Byudjet mablag‘lari ustidan masofaviy nazorat: vazirlikda “Situatsion markaz” faoliyat yuritmoqda
2025-08-04 09:40:00 / Yangiliklar
O‘zbekiston Respublikasi Prezidenti Shavkat Mirziyoyev raisligida 2024-yil 16-yanvar kuni o‘tkazilgan “2024-yilda makroiqtisodiy barqarorlik va iqtisodiy rivojlanishni ta’minlash bo‘yicha ustuvor vazifalar”ga bag‘ishlangan videoselektor yig‘ilishida belgilab berilgan topshiriqlar ijrosini ta’minlash, shuningdek:
- byudjet qonunchiligining buzilishi;
- moliyaviy kamchiliklar va korrupsiyaviy holatlar yuzaga kelishining oldini olish;
- byudjet mablag‘laridan maqsadli va samarali foydalanish ustidan masofaviy monitoring va nazoratni kuchaytirish maqsadida vazirlik huzurida “Situatsion markaz” tashkil etilgan.
Mazkur markaz orqali madaniyat muassasalarida amalga oshirilayotgan barcha moliyaviy operatsiyalar onlayn tarzda kuzatib boriladi va nazorat qilinadi. Bu tizim orqali har bir xarajatning to‘liq aniqligi ta’minlanadi, moliyaviy intizom kuchaytiriladi va mablag‘lardan maqsadli foydalanish kafolatlanadi.
Shuningdek, markaz faoliyatida Hisob palatasining “Masofaviy nazorat markazi” hamda Iqtisodiyot va moliya vazirligining “Monitoring portali” axborot tizimlari integratsiya qilingan holda samarali foydalanilmoqda.
Kuni kecha Hisob palatasi raisi o‘rinbosari Atabek Allaberganov markaz faoliyati bilan yaqindan tanishish maqsadida tashrif buyurdi.
Tashrif davomida u axborot tizimlari orqali amalga oshirilayotgan nazorat jarayonlari, tezkor tahlil va monitoring imkoniyatlari bilan tanishib, markaz faoliyatini yanada takomillashtirish bo‘yicha bir qator amaliy taklif va tavsiyalar bildirdi.