O‘zbekiston Respublikasi Madaniyat vazirligi

Kuni kecha Madaniyat vazirligida vazir o‘rinbosari Yusufjon Usmonov boshchiligida moliyaviy masalalar yo‘nalishida yarim yillik ishlar sarhisob qilindi. Unda, vazirlikning markaziy apparat vakillari, hududlardan tizim rahbarlari videokonferensaloqa  (“Zoom” platformasi) orqali ishtirok etishdi.

Kun tartibidagi 1-masala yuzasidan madaniyat va san’at sohasiga investitsiyalarni jalb qilish va davlat-xususiy sheriklikni rivojlantirish borasida amalga oshirilgan ishlar tahlil qilindi. Joriy yilning 6 oyi mobaynida hududlardan DXSH loyihalarini amalga oshirish bo‘yicha 31 ta loyiha takliflari kelib tushganligi ma'lum qilindi. Xususan, Farg‘ona viloyatida 11 ta, Andijon va Surxondaryoda 5 tadan, Namanganda 4 ta, Toshkent viloyati va Toshkent shahrida 3 tadan, Qoraqalpog‘iston, Qashqadaryo, Samarqand Jizzax va Buxoroda 1 tadan. Shundan 8 ta davlat-xususiy sheriklik bitimlari imzolangan. Shuningdek Navoiy, Xorazm va Sirdaryo viloyatlaridan birorta ham loyiha bo‘yicha vazirlikka taklifi berilmaganligi tanqid qilindi.

“Hududlardagi bo‘sh turgan, ta’mirtalab va samarasiz faoliyat ko‘rsatayotgan madaniyat obyektlariga tadbirkorlarni jalb qilish bo‘yicha targ‘ibot ishlarini yo‘lga qo‘yish hamda DXSH loyihalari ijrosi yuzasidan ma’lumotlarni vazirlikka taqdim etish bo‘yicha doimiy ko‘rsatmalar berib kelinmoqda, biroq, shunga qaramasdan bajarilgan ishlar bo‘yicha ma’lumotlarni Jizzax, Sirdaryo, Samarqand, Xorazm, Navoiy, Qashqadaryo va Surxondaryo viloyatlari umuman taqdim etmagan” – deya hisobot berdi Yusufjon Usmonov.

Navbatdagi masalada vazirlik ichki audit bo‘limining 2025-yil 1-yarim yillik faoliyati sarhisob qilindi. Unga ko‘ra, vazirlikning Ichki audit bo‘limi tomonidan joriy yilning o‘tgan davri mobaynida tizim tashkilotlarida jami 20 ta  nazorat tadbirlari o‘tkazilganligi hamda o‘tkazilgan nazorat tadbirlarida jami 12 ta holatda hujjatlarga huquqiy baho berish uchun Bosh prokuraturaga yuborilganligi haqida ma'lum qilindi. 

Shuningdek, yig‘ilish davomida ko‘chmas mulk obyektlari va yer maydonlari davlat ro‘yxatidan o‘tkazish holati hamda energiya resurslaridan foydalanish samaradorligini oshirish yuzasidan amalga oshirilayotgan ishlar bo‘yicha hisobotlar taqdim etilib, amalga oshirilgan ishlari tahlil qilindi.

Yig‘ilish yakunida ikkinchi yarim yillik rejalari muhokama etilib, mas’ullarga tegishli vazifalar belgilandi. Birinchi yarim yillikda xato va kamchiliklarni bartaraf etish uchun tegishli muddatlar belgilandi, holat qayta takrorlansa kamchiliklarga yo‘l qo‘yilgan tashkilotlar rahbarlari va bosh buxgalterlariga nisbatan belgilangan tartibda ta’sirchan intizomiy jazo choralari ko‘rilishi haqida ogohlantirildi.