Xitoyda e’tirof etilgan “Bahorni quvib” kinokartinasi Rossiyaning “Antares” kinofestivalida ishtirok etadi
2025-07-14 15:00:00 / Yangiliklar
Avvalroq, ushbu kinokartina Xitoyda o‘tkazilgan kinofestivalda e’tirof etilgan edi. (https://t.me/madaniyatvazirligi/48295)
Madaniyat vazirligi huzuridagi Kinematografiya agentligi buyurtmasiga binoan kinorejissyor Ayub Shahobiddinov tomonidan suratga olingan “Bahorni quvib” badiiy filmi, joriy yilning 6–10-avgust kunlari Rossiyaning Moskva shahrida o‘tkaziladigan II Xalqaro “Antares” kinofestivalining asosiy tanlov dasturiga kiritildi.
Film Rossiyada ilk bor namoyish etiladi va rasmiy premyera maqomini oladi.
“Antares” — inson obrazi, kasblar hayoti va ijtimoiy mavzularni badiiy ifodalashga qaratilgan xalqaro kinofestival sifatida tobora e’tirof topmoqda.
2025-yilgi tanlov dasturida 29 ta mamlakatdan 104 ta filmni qamrab olgani bilan mazkur festivalning xalqaro nufuzi va keng qamrovliligini ko‘rsatib turibdi.
Eslatib o‘tamiz, “Bahorni quvib” filmi joriy yil iyul oyida Xitoyning Chunsin shahrida o‘tgan SHHT davlatlari kinofestivalining tanlov dasturida ishtirok etib, unda aktrisa Ra’no Shodiyeva “Eng yaxshi aktrisa” nominatsiyasida g‘oliblikni qo‘lga kiritgan edi.
Ushbu yutuqlar nafaqat ijodiy jamoa, balki o‘zbek kinosi uchun xalqaro maydondagi muhim voqea sifatida baholanmoqda.