O‘zbekiston Respublikasi Madaniyat vazirligi

Xitoyning Chunsin shahrida SHHTga a’zo davlatlar kinofestivali bo‘lib o‘tdi. Mazkur festivalda o‘zbek rejissyori Ayub Shahobiddinovning "Bahorni quvib" filmidagi ijrosi uchun O‘zbekiston Respublikasida xizmat ko‘rsatgan artist, taniqli aktrisa Ra’no Shodiyeva "Eng yaxshi aktrisa" nominatsiyasida g‘olib deb topildi.

“Bunday nufuzli kinofestivalda qatnashganimdan judayam xursandman. Hakamlar tomonidan “Bahorni quvib” filmi juda yuqori baholanib mukofot berishi xursand qildi meni. Rossiya, Eron va boshqa davlat filmlari orasida bizni filmimiz Xitoylik tomoshabinlarni yuragiga ta’sir qila olgan bo‘lsa men xursandman. Bu yutuq keyingi ijodiy ishlarda yangi o‘zgarishlar qilishga sababchi bo‘la oladi deb o‘ylayman! Maqsadimiz o‘zbek filmini butun dunyoga ko‘rsatish!” - deydi film rejissyori Ayub Shahobiddinov.

Shuningdek, kinofestival doirasida SHHTga a’zo davlatlarning kino sohasidagi hamkorligi masalalariga bag‘ishlangan maxsus forum ham tashkil etildi.

Unda tashkilotga a’zo mamlakatlar kino sohasi rahbarlari va mutaxassislari ishtirok etdi. Kino sohasidagi o‘zaro hamkorlikni mustahkamlash, birgalikda yangi kino loyihalarini ishlab chiqish va bu hamkorlikni tizimli ravishda tashkil etish bo‘yicha takliflar muhokama qilindi.

Bundan tashqari, anjuman ishtirokchilariga O‘zbekiston va Xitoy hamkorligida ilk bor suratga olinishi rejalashtirilayotgan "Meni kutgin" nomli yangi xalqaro kinoloyiha haqida ham ma’lumot taqdim etildi.

Tadbir yakunida O‘zbekiston tomoni qo‘shma kinoloyihalarni yaratish va kelgusida SHHT makonida keng qamrovli hamkorlikni amalga oshirishga tayyorligini ta’kidladi.

Eslatib o‘tamiz, avvalroq Tsindaoda O‘zbekiston Respublikasi madaniyat vaziri Ozodbek Nazarbekov va Xitoy Xalq Respublikasi madaniyat va turizm vaziri Sun Yeli o‘rtasida hamkorlik uchrashuvi davomida Chunsin shahrida bo‘lib o‘tayotgan ShHT kinofestivalida O‘zbekiston Respublikasida xizmat ko‘rsatgan artist, o‘zbek aktrisasi Ra’no Shodiyeva “Eng yaxshi ayol roli” nominatsiyasida g‘olib bo‘lgani va oliy mukofot bilan taqdirlangani bilan Xitoy Xalq Respublikasi madaniyat va turizm vaziri Sun Yeli O‘zbekiston Respublikasi madaniyat vaziri Ozodbek Nazarbekovni samimiy muborakbod etib, o‘zbek kinosi ham rivojlanayotganligiga alohida urg‘u bergan edi.