Kuni kecha Madaniyat vazirligida vazirning birinchi o‘rinbosari Avazxon Tadjixanov hamda Turkiyadagi taniqli kino kompaniyasi “SAFF MEDIA” bosh direktori Fetullah Bingul o‘rtasida uchrashuv bo‘lib o‘tdi.

Uchrashuv davomida o‘zaro hamkorlik aloqalari, Turksoy Xalqaro turkiy madaniyat tashkiloti tashabbusi bilan amalga oshirilishi rejalashtirilgan hamkorlik loyihalari muhokama qilindi.

Mazkur hamkorlik doirasida Turksoyga a’zo bo‘lgan davlatlarda mamlakat tarixi, madaniy merosi, islom olamining buyuk shaxslari, ilm ahli, Turk dunyosining eng nufuzli olimlari, tasavvuf va davlat arboblari hamda madaniyatini targ‘ib etuvchi filmlar orqali kelajak avlodga o‘ziga xos axborot zaxirasini yaratish rejalashtirilgan.

Xususan, O‘zbekistonda 30-40 daqiqalik qariyb 20 seriyadan iborat hujjatli filmlar, shuningdek, Instagram, Tik Tok, Youtube Shorts va boshqa platformalarda joylashtirish uchun mo‘ljallangan 1-3 daqiqalik videoroliklar suratga olinishi rejalashtirilgan bo‘lib, ushbu hujjatli filmlar orqali buyuk olimlar va ilm ahllari haqidagi qiziqarli va tomoshabinni o‘ziga jalb etuvchi faktlarni yoritish, O‘zbekistonning madaniy boyliklarini xalqaro maydonda yanada kengroq tanitish maqsad qilingan.

E’tiborli jihati shundaki, turk tomonining taklifiga binoan, filmlarning asosiy qismi sun’iy intellekt asosida yaratilishi nazarda tutilib, tomoshabinga tarixning asl mohiyatini, uning betakror va go‘zalligini, ajdodlarimizning hayoti va faoliyatini chuqurroq anglashga yordam beradi.

Shu bilan birga, hujjatli filmlarni suratga olishda eng mashhur va o‘z sohasining yetuk olimlarini jalb etish nazarda tutilmoqda.

Uchrashuv davomida Fetullah Bingul tomonidan hujjatli filmlar ketma-ketligining Turkiyada olingan qismlari hamda O‘zbekistonda olinishi  rejalashtirilgan loyihalar taqdimoti o‘tkazilib, loyihalar yuzasidan kelgusida amalga oshiriladigan ishlar xususida kelishib olindi.