Kuni kecha O‘zbekiston madaniyat vazirining birinchi o‘rinbosari Avazxon Tadjixanov hamda Bolalar kontentini rivojlantirish markazi rahbari Jahongir Ahmedov bolalar kontentini yaratishda teatrlar bilan hamkorlikni yo‘lga qo‘yish maqsadida xizmat safari bilan Nukusga bo‘lishdi.

Tashrif davomida Qoraqalpog‘iston Respublikasi madaniyat vaziri Begisbay Temirbayev bilan birgalikda Qoraqalpoq davlat Yosh tomoshabinlar teatri, Qoraqalpoq davlat Qo‘g‘irchoq teatri va Muza shaxsiy teatrlari jamoalari bilan uchrashuv o‘tkazildi, unda, teatrlarni rivojlantirish va respublikamizda yangi formatdagi bolalar kontentini yaratish masalalari bo‘yicha fikr mulohazalar yuritilib, takliflar tinglandi.

Uchrashuv davomida teatrning bugungi kundagi faoliyati, mavjud muammolar va istiqboldagi rejalar atroflicha muhokama qilindi. Teatr jamoasi tomonidan ilgari surilgan taklif va tashabbuslar tinglanib, ular bo‘yicha tegishli tavsiyalar berildi.

Shuningdek, teatr faoliyatini yanada rivojlantirish, bolalar uchun sifatli, mazmunli va tarbiyaviy ahamiyatga ega spektakllar yaratish borasida mehmonlar tomonidan qator takliflar bildirildi. Jumladan, tomoshabinlar — ayniqsa bolalar va oila a’zolarini teatrga kengroq jalb etishning samarali yo‘llari haqida ham fikrlar almashildi.

Uchrashuv so‘ngida teatr xodimlari o‘zlarini qiziqtirgan savollariga batafsil javoblar oldilar. Uchrashuv iliq va samimiy ruhda o‘tib, madaniy-ma’rifiy sohada hamkorlikni yanada kuchaytirish yo‘lida muhim qadam bo‘ldi.

Tashrif davomida O‘zbekiston davlat san’at va madaniyat instituti Nukus filiali hamda "Qaraqalpaqfilm" kinostudiyasi hayoti bilan yaqindan tanishildi.

O‘zbekiston madaniyat vazirining birinchi o‘rinbosari Avazxon Tadjixanov, Bolalar kontentini rivojlantirish markazi rahbari Jahongir Ahmedov, Qoraqalpog‘iston Respublikasi madaniyat vaziri Begisbay Temirbayevlarning O‘zbekiston davlat san’at va madaniyat instituti Nukus filialiga tashrif davomida filialni ko‘zdan kechirayotgan Qoraqalpog‘iston Respublikasi Jo‘qorg‘i Kengesi Raisining o‘rinbosari Rustam Saparbayevni uchratib, filial faoliyati haqida suhbatlashishdi.