Kuni kecha vazirning birinchi o‘rinbosari Bahodir Ahmedov boshchiligida Samarqand ixtisoslashtirilgan san’at maktabida yig‘ilish bo‘lib o‘tdi. Unda, boshqarmaning markaziy apparati xodimlari, shuningdek, boshqarma tasarrufidagi barcha tashkilot rahbarlari ishtirok etdi. Yig‘ilishda, ijodiy yo‘nalishdagi faoliyatni takomillashtirish, milliy san’atimizni keng targ‘ib etish hamda tizimli loyihalar ustida ishlash yuzasidan Samarqand viloyati Madaniyat boshqarmasi boshlig‘i Orif Xayitovga tegishli topshiriq va ko‘rsatmalar berildi.

Shuningdek, yig‘ilish davomida O‘zbekiston Respublikasi Madaniyat vazirining tegishli buyrug‘iga asosan, Samarqand viloyati Madaniyat boshqarmasi boshlig‘ining moliyaviy masalalar bo‘yicha o‘rinbosari lavozimiga tayinlangan Jamshid Jumanov hamda ijodiy masalalar bo‘yicha o‘rinbosari lavozimiga tayinlangan Botir Shaymatovlar jamoaga tanishtirildi.

Bahodir Ahmedov yangi lavozimga tayinlanganlarni tabriklab, ularning faoliyati davomida Samarqand viloyati madaniyat va san’at sohasida yangicha tashabbuslar hamda amaliy yondashuvlar kutilayotganini ta’kidlab, kelgusidagi faoliyatlarida ulkan muvaffaqiyatlar tiladi.