O‘zbekistonning Turkiyaga yangi tayinlangan Favqulodda va Muxtor Elchisi Ilhom Haydarov Xalqaro turkiy madaniyat tashkiloti – TURKSOYning Anqara shahridagi Bosh kotibiyatiga tashrif buyurib, Bosh kotib Sulton Rayev bilan uchrashdi.

Uchrashuvda TURKSOY Bosh kotibi o‘rinbosari Sayit Yusuf, O‘zbekistonning TURKSOYdagi vakili Shavkat Ortiqov, O‘zbekistonning Turkiyadagi elchixonasi diplomatlari ishtirok etdi.

Muloqot avvalida Sulton Rayev elchini Turkiyada diplomatik missiyasi boshlangani bilan samimiy tabrikladi va mas’uliyatli faoliyatida ulkan muvaffaqiyat tiladi.

O‘z navbatida, Bosh kotib O‘zbekistonning turkiy dunyo madaniy merosi va tarixida tutgan o‘rni beqiyos ekanini e’tirof etib, so‘nggi yillarda O‘zbekiston Respublikasi Prezidenti Shavkat Mirziyoyev boshchiligida olib borilayotgan ochiq va faol tashqi siyosat tufayli mamlakatning TURKSOY doirasidagi hamkorlik aloqalari yangi bosqichga ko‘tarilganini alohida ta’kidladi.

Xususan, turkiy mamlakatlarda tashkil etilayotgan madaniy tadbirlar, ilmiy-ma’rifiy anjumanlar, turkiy tillar va adabiyotlari rivojiga bag‘ishlangan xalqaro konferensiyalar, amalga oshirilayotgan qator loyihalarda O‘zbekiston vakillari faol qatnashayotgani, O‘zbekistonda tashkilot bilan birgalikda turli festivallar, ko‘rgazmalar, ijodiy forumlar o‘tkazish an’anaga aylanganini qayd etdi.

Yaqinda TURKSOYda O‘zbekiston vakilining rasman faoliyat boshlagani esa o‘zaro aloqalarni yanada rivojlantirishga xizmat qilishiga ishonch bildirdi. Shuningdek, O‘zbekistonning Turkiyadagi elchixonasi bilan hamkorlikka doimo tayyor ekanini aytib o‘tdi.

Favqulodda va Muxtor Elchi Ilhom Haydarov azaldan tarixi, tili va dini, urf-odat va an’analari, bugungi orzu-intilishlari mushtarak bo‘lgan turkiy xalqlar o‘rtasida do‘stlik va hamjihatlik munosabatlarini mustahkamlashda TURKSOYning o‘rni va ahamiyati alohida ekanini ta’kidladi. Turkiy millatlarning ma’naviy birligini ta’minlash, mushtarak qadriyatlarimizni asrab-avaylash va rivojlantirish, umumiy boyligimiz bo‘lmish noyob tarixiy merosimizni o‘rganish va targ‘ib etish, buyuk ajdodlarimiz xotirasini abadiylashtirish borasida keng ko‘lamli madaniy-gumanitar dasturlar amalga oshirilayotganiga e’tibor qaratdi.

TURKSOY tomonidan o‘tkazib kelinayotgan yirik anjumanlar madaniyat va san’at sohasini qo‘llab-quvvatlash va rivojlantirish bilan bir qatorda, xalqlarimiz o‘rtasidagi qardoshlik rishtalarini mustahkamlashga ham xizmat qilayotganini e’tirof etdi.

O‘zbekiston Respublikasi Prezidentining alohida e’tibori va tashabbusi bilan maqom, baxshichilik kabi betakror san’at turlarini rivojlantirish bo‘yicha keng ko‘lamli ishlar olib borilayotgani, shundan kelib chiqib, TURKSOY, O‘zbekiston Respublikasi Madaniyat vazirligi va boshqa tegishli tashkilotlar bilan hamkorlikda o‘zbek milliy madaniyatini yanada faol targ‘ib qilish maqsadida turli tadbirlar tashkil etish, ilmiy-ma’rifiy ishlarni kuchaytirish yuzasidan o‘z takliflarini bildirdi.

Uchrashuv do‘stona va samimiy ruhda kechdi.