Yana bir Ozarbayjon vakiliga "O‘zbek madaniyati elchisi" maqomi berildi
2025-07-02 20:00:00 / Yangiliklar
Avvalroq, ayni kunlarda O‘zbekiston madaniyat vaziri Ozodbek Nazarbekov xizmat safari bilan Ozarbayjonda bo‘lib turganligi hamda Ozarbayjonda xizmat ko‘rsatgan artist Sahib Pashazadega "O‘zbek madaniyati elchisi" maqomi berilganligi haqida xabar berilgan edi.
Bugun, 2-iyul kuni vazir Ozodbek Nazarbekov hamda Ozarbayjon Milliy Majlisi deputati, Ozarbayjon parlamentining madaniyat qo‘mitasi raisi o‘rinbosari Gyunay Efendiyeva o‘rtasida hamkorlik uchrashuvi bo‘lib o‘tdi.
"Ozarbayjon – mamlakatimizning Janubiy Kavkazdagi strategik hamkori va qardosh davlat hisoblanadi. O‘zbekiston va Ozarbayjon qadimiy va yangi tarixda hamisha yaqin hamkorlik olib borgan bo‘lib, do‘stona munosabatlarni saqlab kelmoqda" - deydi vazir Ozodbek Nazarbekov.
Uchrashuv davomida so‘nggi yillarda ikki davlat o‘rtasidagi madaniy hamkorlik aloqalari mustahkamlanib borayotganligi haqida ma’lum qilinib, O‘zbekiston va Ozarbayjon o‘rtasidagi madaniy aloqalar uzoq tarixga ega ekanligi ma’lum qilindi.
"O‘zbekistonning xalqaro hamkorlari orasida Ozarbayjonning alohida o‘rni borligi mamlakatlarimiz o‘rtasidagi oliy va boshqa darajadagi faol muloqotdan dalolat beradi" - dedi Gyunay Efendiyeva.
Uchrashuv yakunida O‘zbekiston madaniyat vaziri Ozodbek Nazarbekov ikki qardosh xalq o‘rtasidagi madaniy hamkorlikni rivojlantirishda qo‘shgan hissasi uchun Ozarbayjon Milliy Majlisi deputati, Ozarbayjon parlamentining madaniyat qo‘mitasi raisi o‘rinbosari Gyunay Efendiyevaga "O‘zbek madaniyati elchisi" maqomini topshirdi.