O‘zbekiston Respublikasi Madaniyat vazirligi

Vazir o‘rinbosari Murodjon Majidov xizmat safari bilan Buxoro viloyatida bo‘ldi. Xizmat safari davomida Murodjon Majidov Buxoro viloyati hokimi Botir Zaripov hamrohligida XXI an’anaviy “Ipak va ziravorlar festivali”ga tayyorgarlik jarayonlari bilan tanishib, festivalni yuqori saviyada o‘tkazishga qaratilgan chora-tadbirlar muhokama qilindi. Tashkiliy qo‘mita a’zolari va mutasaddi tashkilotlar vakillari ishtirokida amalga oshirilgan uchrashuvda muhim vazifalar belgilab olindi.

Shuningdek, vazir o‘rinbosari Romitan va Peshku tumanlarida joylashgan madaniyat markazlari hamda bolalar musiqa va san’at maktablarida bo‘lib, mavjud sharoitlar, ijodiy faoliyat, muassasalar holati bilan yaqindan tanishdilar.

Tashrif doirasida rahbar va mutasaddi xodimlar bilan ochiq muloqot tashkil etilib, ularning taklif va mulohazalari tinglandi, mavjud muammolar o‘rganildi hamda ularni bartaraf etish bo‘yicha tegishli tavsiyalar berildi.

Mazkur tashrif joylardagi madaniy-ma’rifiy muassasalar faoliyatini yanada takomillashtirish, festivalga puxta tayyorgarlik ko‘rish va ijodkorlar uchun kengroq imkoniyatlar yaratishga xizmat qiladi.