O‘zbekiston davlat san’at va madaniyat institutida “Karyera kuni” mehnat yarmarkasi bo‘lib o‘tdi
2025-05-30 19:25:00 / Yangiliklar
Bugun, 30-may kuni madaniyat vaziri Ozodbek Nazarbekov O‘zbekiston davlat san’at va madaniyat institutiga tashrif buyurib, institutda tashkil etilgan “Karyera kuni” mehnat yarmarkasi bilan tanishdi.
Institutda talabalari hamda institutni tamomlayotgan yosh mutaxassislar bilan korxona, tashkilot vakillarining jonli muloqotini tashkil etish, mavjud bo‘sh ish o‘rinlari to‘g‘risida ma’lumotlar berish va talabalarni bandligini ta’minlash maqsadida “Karyera kuni” mehnat yarmarkasi o‘tkazildi.
Tadbir doirasida institut hovlisida mutaxassislik kafedralari va turli tashkilotlar tomonidan “Karyera kuni” mehnat yarmarkasi doirasida taqdimotlar namoyish etildi.
Madaniyat vaziri rektor hamrohligida mehnat yarmarkasini ko‘zdan kechirdi.
Vazir Ozodbek Nazarbekov bitiruvchi yoshlarni samimiy tabriklab, kelgusida yetuk mutaxassis sifatida yurtimiz san’at va madaniyati rivojiga hissa qo‘shishlari, xususan, kutubxona-axborot faoliyati bitiruvchilari yurtimizda kitobxonlikni keng targ‘ib etishlari lozimligini ta’kidladi.
Shuningdek, vazirlik va institut hamkorligida yoshlar o‘rtasida milliy kontentni rivojlantirishga qaratilgan eng yaxshi ssenariylar va pyesalar, ijtimoiy roliklar, fotolar kabi tanlovlar e’lon qilish va g‘oliblarni munosib rag‘batlantirish, havaskor fotograf va mobilograflar uchun o‘quv kurslari tashkil etish kabi takliflarni ham ilgari surdi.