O‘zbekiston Respublikasi Madaniyat vazirligi

Kuni kecha Buxoro Davlat universitetida Abdurauf Fitrat nomidagi Buxoro maqom san’atiga ixtisoslashtirilgan maktab-internati tashkil etilganining 5 yilligi munosabati bilan “Yangi O‘zbekiston shukuhidagi ixtisoslashgan maqom maktablarida o‘qitishning zamonaviy uslublari” mavzusida respublika ilmiy-amaliy konferensiyasi hamda Abdurauf Fitrat nomidagi Buxoro maqom san’atiga ixtisoslashtirilgan maktab-internati, Farg‘ona ixtisoslashtirilgan maktab-internati, Xorazm ixtisoslashtirilgan maktab-internatlarining ustoz-shogirdlari ijrosida tashkil etilgan jonli ijrodagi konsert dasturi bo‘lib o‘tdi.

Unda Yunus Rajabiy nomidagi O‘zbek milliy musiqa san’ati instituti rektori Eldor Shermanov boshchiligida bir qator professor-o‘qituvchilar ishtirok etdi.

Konferensiyada o‘zbek milliy musiqa merosining yangi ijrochilik an’analarini, maktablari, o‘rganish masalalari, mumtoz musiqa merosi: o‘tmishi va buguni, ta’lim tizimida milliy musiqa san’atining o‘qitilishi masalalari ko‘rib chiqildi.

Mazkur konferensiyada oliy ta’lim muassasalarining professor-o‘qituvchilari, ixtisoslashtirilgan maqom maktablari o‘qituvchilari, ixtisoslashtirilgan san’at maktablari o‘qituvchilari, tayanch doktorantlar, doktorantlar, mustaqil izlanuvchilar hamda magistr va iqtidorli talabalar o‘z maqolalari bilan (offlayn va onlayn) ishtirok etishdi.

Shuningdek, mazkur respublika ilmiy-amaliy anjumani doirasida Buxoro, Xorazm, Farg‘ona-Toshkent ijrochilik maktablarining yirik namoyandalari bilan ijodiy uchrashuvlar, mahorat darslari o‘tkazildi.

Konsertda “Buxoro mavjlari” , “Ufari Oromijon” , “Nazzora qil”, “Dugoh Husayn”, “Oh ki”, “Chorzarb”, “Favvora”, “Tanbur”, “Buxorocha” kabi bir qator kuy va ashulalar maqom kechasida yangradi va konsert tomoshabinlarini olqishiga sazovor bo‘ldi.