Madaniyat vazirligining xodimlari mas’ul lavozimlarga tayinlandi
2025-05-13 21:00:00 / Yangiliklar
Bugun, 13-may kuni madaniyat vaziri Ozodbek Nazarbekov boshchiligida vazirlik markaziy apparati tarkibiy bo‘linmalari, hududiy madaniyat organlari, tizimdagi tashkilot va muassasalar rahbar hamda xodimlari ishtirokida yig‘ilish o‘tkazildi.
Unda madaniyat vaziri “O‘zbekiston Respublikasining ayrim qonun hujjatlariga jonli ijro sanʼatini yanada rivojlantirishga qaratilgan o‘zgartirish va qo‘shimchalar kiritish to‘g‘risida”gi Qonun, Hukumatning “Konsert-tomosha faoliyatida jonli ijroni yanada rag‘batlantirish bo‘yicha qo‘shimcha chora-tadbirlar to‘g‘isida”gi qarori mazmun-mohiyati, unda belgilangan vazifalar haqida batafsil so‘z yuritdi. Mazkur hujjatlar ijrosini taʼminlash bo‘yicha masʼullarga tegishli topshiriqlar berdi.
Tadbirda tashkiliy masala ko‘rildi. Madaniyat vaziri Ozodbek Nazarbekov Hukumatning tegishli topshiriqlariga asosan vazirlikning ikki nafar xodimi turli tashkilotlarda mas’ul lavozimlarga tayinlanganini ma’lum qildi.
Jumladan, vazir maslahatchisi Shavkat Ortiqov O‘zbekistonning Xalqaro turkiy madaniyat tashkiloti
(TURKSOY)dagi vakili lavozimiga, vazirlikning Ta'lim sohasini muvofiqlashtirish bo‘limi boshlig‘i Omonulla Salihov Kamoliddin Behzod nomidagi Milliy rassomlik va dizayn instituti rektori lavozimiga tayinlanganini bildirib, ularning keyingi faoliyatlarida ulkan muvaffaqiyat tiladi.
Shuningdek, vazirlikda yangi tayinlov amalga oshirilgani maʼlum qilindi. Vazirlikning Teatr, sirk san’ati va kinematografiya sohasini muvofiqlashtirish bo‘limi boshlig‘i lavozimiga Shoxruxmirzo Qodirov tayinlandi.
Vazir Ozodbek Nazarbekov mas’ul lavozimlarga tayinlanganlar faoliyatiga omad tilab, o'z bilim va iqtidorlarini soha rivoji yo‘lida safarbar etishlariga katta ishonch bildirdi.