Hurmatli Vazir,

Hurmatli Bosh kotiblar, Prezidentlar,

Hurmatli fan, madaniyat va san’at vakillari,

Hurmatli mehmonlar!

Turk dunyosining ilm-fan va madaniyat beshigi bo‘lgan, boy tarixi, sivilizatsiyasi va qadimiy donishmandligi bilan ajralib turuvchi O‘zbekiston zaminida, mana shunday mazmunli anjumanda siz bilan birga bo‘lish men uchun ulkan sharaf va katta mamnuniyatdir.

2023-yilda Qorabog‘ning gavhari — Shusha shahrida, Ozarbayjonning milliy yetakchisi Haydar Aliyev tavalludining 100 yilligiga bag‘ishlab tashkil etilgan 1-Turk dunyosi madaniyat forumi, umumiy madaniyatimizning qudrati va hamkorligimiz salohiyatini yana bir bor yaqqol namoyon etdi.

Bugun esa O‘zbekiston Madaniyat vazirligi mezbonligida ushbu nufuzli forumning ikkinchi bosqichini amalga oshirayotganimiz, o‘zaro madaniy birdamligimizning barqarorligi va davomiyligining yorqin ifodasidir.

Shu munosabat bilan, Forumni har yili TURKSOYga a’zo davlatlardan birida o‘tkazish haqida qaror qabul qilgan TURKSOY Doimiy Kengashi a’zolari va barcha hurmatli vazirlarimizga chuqur minnatdorchilik bildiraman.

TURKSOY tashkiloti sifatida 30 yildan ortiq faoliyatimiz davomida biz turkiy dunyoning umumiy o‘zligini san’at, til, adabiyot va musiqa orqali asrab-avaylashni eng muhim burchimiz deb bildik.

Mazkur forum esa nafaqat madaniy uchrashuv, balki umumiy qadriyatlar asosida shakllanayotgan sivilizatsiya konsepsiyasining, kelajak sari intilgan mushtarak maqsadlarimizning timsolidir.

O‘zbekiston — buyuk mutafakkir, shoir va faylasuflar yurti sifatida tarixan turk-islom sivilizatsiyasining markazida bo‘lgan. Alisher Navoiydan Imom Moturidiygacha, Bahouddin Naqshbanddan Abu Rayhon Beruniygacha bo‘lgan ulug‘ allomalar bizga sog‘lom tafakkur va yuksak axloq yo‘lini ko‘rsatgan.

Bugun biz bu boy merosni nafaqat eslab qolmoqdamiz, balki uni kelajak avlodlarga yetkazish mas’uliyatini ham o‘z zimmamizga olyapmiz.

Hurmatli ishtirokchilar!

Turk dunyosi madaniyat forumi — bu turli mamlakatlardan kelgan san’atkorlar, yozuvchilar, olimlar va madaniyat arboblarini birlashtiruvchi muhim maydon bo‘lib, u madaniy siyosatimizni shakllantirishga xizmat qiladigan yangi g‘oyalar tug‘ilishiga ham zamin yaratadi.

Shu o‘rinda, o‘z fikr va qarashlari bilan kelajagimizni yoritishga hissa qo‘shayotgan barcha ma’ruzachilarga oldindan minnatdorchilik bildiraman.

Aziz birodarlarim, opa-singillarim!

Forumning muvaffaqiyatli o‘tishini tilagan holda, bizni yuksak mehmondo‘stlik bilan qarshi olgan O‘zbekiston Madaniyat vazirligiga va tadbirni tashkillashtirishda faol ishtirok etgan barcha muassasalarga chuqur minnatdorchilik bildiraman.

Turk madaniyatida har bir naqsh — bu o‘ziga xos ma’no. Sopol, gilam naqshlari, musiqa asarlari — ularning barchasi nafaqat san’at namunasi, balki o‘zlik, tarix va qadriyatlarning timsolidir.

Turk madaniyatining estetikasi va teranligi faqat ko‘zni quvontiradigan tasviriy go‘zallik emas, u — butun insoniyatni birlashtiruvchi umumiy tilga aylangan.

Bu til inson qalbidagi go‘zallikni ifoda etadi, madaniyatimiz esa bu umumiy tilni bizning yagona madaniy maydonimizga aylantiradi.

Bugungi murakkab va noaniq dunyoda muvozanatga intilish mavjud. Bu izlanishga javob esa o‘tmishdagi qadimiy madaniyatlarda yashiringan. Turk madaniyati esa insoniyatning birga yashashi, umumiy qadriyatlarga asoslanishi uchun zarur kalitni o‘zida mujassam etadi.

Kelajakka dadil qadam tashlash uchun biz qalbimizdagi ichki go‘zallik, totuvlik va estetikaga tayanamiz. Asrab kelayotgan madaniyatimiz esa butun insoniyat uchun umid manbaidir.

Ildizlarimiz bir, kelajagimiz umumiy.

Birligimiz bardavom, madaniyatimiz barhayot bo‘lsin!

E’tiboringiz uchun rahmat.