Fransiyada O‘zbekiston madaniyati kunlari o‘tkaziladi
2025-04-22 12:00:00 / Yangiliklar
Xabaringiz bor, joriy yilning 11-13-mart kunlari Prezident Shavkat Mirziyoyevning Fransiyaga davlat tashrifi davomida ikki mamlakatning hamkorlik munosabatlari mutlaqo yangi bosqichni boshlab berdi.
Ta’kidlash joizki, O‘zbekiston va Fransiya madaniy-gumanitar sohada keng qamrovli va samarali hamkorlikni yo‘lga qo‘ygan davlatlardir.
Madaniyat vazirliklari o‘rtasidagi kelishuvlar, san’at va ijodning turli yo‘nalishidagi hamkorlik, albatta, xalqlarimizni yanada yaqinlashtirmoqda.
Kuni kecha Madaniyat vazirligida Fransiyada bo‘lib o‘tadigan “O‘zbekiston madaniyati kunlari” doirasida teatr hamkorligi va an’anaviy sayllar bo‘yicha muhim uchrashuv bo‘lib o‘tdi.
Uchrashuvda O‘zbekiston madaniyat vazirining birinchi o‘rinbosari Avazxon Tadjixanov, vazirning Xalqaro masalalar bo'yicha maslahatchisi Shoxrux Akbarov hamda Fransiyaning nufuzli “Théâtre de la Vie” teatrining rahbariyati vakili KIA Sudabeh ishtirok etdilar.
Suhbat chog‘ida madaniyat kunlari doirasida rejalashtirilgan asosiy tadbirlar batafsil muhokama qilindi. Jumladan, 25-may kuni Pkaarij shahrining markazida joylashgan “Théâtre de la Vie” teatri hamda unga tutash ko‘chalarda o‘zbek xalqining milliy urf-odatlari, qadriyatlari va an’analarini namoyon etuvchi an’anaviy sayllarni tashkil etish masalasida kelishuvga erishildi.
Mazkur sayllarda mehmonlarga o‘zbek milliy musiqa va raqs san’ati, amaliy bezak san’ati namunalarini namoyish etish, shuningdek, milliy taomlar ko‘rgazma va taqdimotlarini o‘tkazish rejalashtirilmoqda.
Tadbir doirasidagi har bir yo‘nalish, jumladan teatr jamoalari o‘rtasidagi ijodiy safarlar, spektakllar almashinuvi va sahna san’ati bo‘yicha tajriba almashish masalalari ham alohida muhokama qilindi.
Bu tashabbuslar O‘zbekiston va Fransiya o‘rtasidagi madaniy aloqalarni mustahkamlash, xalqlarimizni yanada yaqinlashtirish va o‘zaro ijodiy hamkorlikni yangi bosqichga olib chiqishga xizmat qiladi.