O‘zbekiston Respublikasi Madaniyat vazirligi

So‘nggi yillarda O‘zbekiston va Turkiya o‘rtasidagi hamkorlik munosabatlari barcha sohada, xususan, madaniy-gumanitar sohada jadal sur’atlar bilan rivojlanib bormoqda.

 

Kuni kecha Anqara shahrida buyuk vatandoshimiz, olim, ilm-fan va ma’rifat ramziga aylangan Ahmad Al-Farg‘oniy byustining tantanali ochilish marosimi bo‘lib o‘tdi.

 

Unda, turli davlatlardan delegatsiya a’zolari hamda O‘zbekiston madaniyat vazirining birinchi o‘rinbosari Avazxon Tadjixanov boshchiligidagi delegatsiya ham ishtirok etishdi.

 

O‘zbekiston va xalqaro turkiy madaniyat tashkiloti – Turksoy sa’y-harakatlari tufayli amalga oshirilgan ushbu tadbir xalqlarimiz o‘rtasidagi o‘zaro hurmat, do‘stlik va hamjihatlik munosabatlarining yanada mustahkamlanishi, noyob tariximiz va merosimizni o‘rganish va targ‘ib etishda katta ahamiyat kasb etadi, albatta.

 

Marosimda O‘zbekiston madaniyat vazirining birinchi o‘rinbosari Avazxon Tadjixanov nutq so‘zlab tadbirda yig‘ilganlarni bayram bilan muborak etdi.

 

"O‘zbekistonda Hurmatli Prezidentimiz Shavkat Miromonovich Mirziyoyev tomonlaridan ilm-fanga, ta’lim-tarbiyaga juda katta e’tibor qaratilmoqda. Biz Uchinchi Renessansni barpo etishni o‘z oldimizga ulkan maqsad qilib qo‘yganmiz.
Mana shunday ezgu niyatlar yo‘lida Farg‘oniydek ajdodlarimiz borligi bizga katta kuch va shijoat bag‘ishlaydi.
Bugun buyuk allomaning byusti Turkiya poytaxti — Anqara shahrida ochilayotgani katta ramziy ma’noga ega. 
Chunki O‘zbekiston va Turkiya xalqlari nafaqat tarixan, balki qalban ham yaqindirlar.
Shu o‘rinda, mazkur byustning o‘rnatilishi munosabati bilan Turkiya Respublikasi Hukumatiga, turk xalqiga O‘zbekiston Respublikasi Madaniyat vazirligi nomidan chuqur minnatdorlik bildiraman" – dedi Avazxon Tadjixanov.

 

Oradan qancha asrlar o‘tmasin, Ahmad al-Farg‘oniy ilmiy izlanishlari va asarlari bilan jahon fan olamida katta iz qoldirgan, umumbashariy taraqqiyotga salmoqli hissa qo‘shgan ulug‘ olim sifatida yuksak qadr topib boraveradi. Ahmad al-Farg‘oniyning ilm-fan rivojiga qo‘shgan hissasi dunyo olimlari tomonidan ham keng e’tirof etiladi.