27-mart – Xalqaro teatr kuniga bag‘ishlangan vazir Ozodbek Nazarbekov nutqi
2025-03-27 15:55:00 / Rahbariyatning bayonotlari va nutqlari
Assalomu alaykum, hurmatli ustozlar, qadrli hamkasblar!
Teatr san’atining aziz fidoyilari!
Avvalo, barchangizni 27-mart – Xalqaro teatr kuni bilan chin qalbimdan tabriklayman.
Teatr shunday bir san’atki, unda hammasi tabiiy va samimiy. Bugun ana shu samimiyat egalarining kasb bayrami sifatida biz uchun qadrlidir.
Inson madaniyatini, ma’naviy dunyosini, ongu tafakkurini yuksaltirishda teatrning o‘rni beqiyos.
U odamlarni ezgulikka chorlaydi, yaxshilikka undaydi, eng go‘zal his-tuyg‘ularni in’om etadi.
Bu dargohda tomoshabin aktyorlarning nafaqat nigohini, balki nafasini ham jonli his qilib turadi.
Sahnada o‘zini, atrofidagilarni, bir so‘z bilan aytganda, hayotni ko‘radi.
Aktyorlar bilan birga yashaydi, yig‘laydi, kuladi...
Shu ma’noda, teatrni hayot ko‘zgusi deyish mumkin.
Bugungi globallashuv davrida, turli mafkuraviy xurujlar, inson madaniyatiga tahdidlar kuchaygan bir sharoitda teatrlarning ahamiyati har qachongidan ham yuksak, desak mubolag‘a bo‘lmaydi.
Ayniqsa, yoshlarni barkamol qilib tarbiyalashda, jonajon Vatanimizga fidoyi insonlar etib kamol toptirishda, jaholatga qarshi ma’rifat bilan kurashishda teatr san’atining, siz, azizlarning o‘rningiz beqiyos.
Biz buni yaxshi anglaymiz va qadrlaymiz.
Sizlarga yaxshi ma’lumki, so‘nggi yillarda Hurmatli Prezidentimiz boshchiliklarida teatr san’atini rivojlantirishgajuda katta e’tibor qaratilmoqda.
O‘tgan yilning noyabr oyida bu borada Davlatimiz rahbarining alohida qarorlari qabul qilindi.
Moddiy imkoniyatlar kengaydi.
Dramaturglar uchun Mahmudxo‘ja Behbudiy, yosh rejissyorlar uchun Bahodir Yo‘ldoshev nomidagi mukofotlar ta’sis etildi.
O‘zbekiston tyeatr arboblari uyushmasi huzuridaDramaturgiya va teatr tanqidchilari klubi tashkil qilindi.
Teatrlar uchun milliy qahramon va inson qadri uchun ezgu g‘oyasini targ‘ib etuvchi davlat buyurtmalari joriy qilindi.
rejissyor – dramaturg – kompozitor – rassom tamoyili asosida ijodiy hamkorlikni kengaytirishga qaratilgan “NIGOH” ijodiy seminari yo‘lga qo‘yildi.
Va yana ko‘p-ko‘p yangiliklar hayotga tatbiq etilmoqda.
Bu islohotlarning barchasi teatr san’atini rivojlantirish va ijodkorlarni qo‘llab-quvvatlashga qaratilgani bilan alohida diqqatga sazovordir.
Ijod – mashaqqatli jarayon. Parda ortida qancha mehnat, qancha zahmat, qancha qayg‘u va dard yotganinisan’at ahli yaxshi biladi.
Tyeatr san’ati vakillari har qanday qiyinchilikni, hayot yo‘llarida uchrab turadigan har qanday muammo va mashaqqatlarni mardonavor yengib o‘tib, sevgan kasbiga, qadrdon sahnasiga hamisha sadoqat ko‘rsatib, fidoyilik bilan xizmat qilib kelishmoqda.
Men teatr san’ati sohasida faoliyat yuritayotgan barchani madaniyatimizning chinakam fidoyilari deb atayman.
Sizlarga har qancha minnatdorlik bildirsak arziydi.
Yana bir bor sizlarni bugungi bayram bilan samimiy tabriklab, barchangizga sihat-salomatlik, kuch-g‘ayrat vafaoliyatingizda ulkan muvaffaqiyatlar tilayman.
Xonadonlaringizdan hech qachon tinchlik-xotirjamlik, fayzu baraka, baxt va omad arimasin!
E’tiboringiz uchun rahmat.
