"Amir Temur va temuriylar" haqidagi filmning ayrim sahnalari Mo‘g‘ulistonda tasvirga olinishi rejalashtirilmoqda
2025-03-25 11:55:00 / Yangiliklar
Kuni kecha Madaniyat vazirligi huzuridagi Kinematografiya agentligi direktori Shuhrat Rizayev Mo‘g‘ulistonning O‘zbekistondagi Favqulodda va Muxtor Elchisi Daadanxuu Batbaatar bilan uchrashdi.
Uchrashuvda O‘zbekiston va Mo‘g‘ulistonning kino sohasidagi hamkorligini rivojlantirish, qo‘shma filmlar suratga olish hamda ikki davlat o‘rtasidagi madaniy aloqalarni yanada mustahkamlash masalalari muhokama qilindi.
Shuningdek, “Tirik tarix” turkum filmlar doirasida suratga olinishi rejalashtirilayotgan Amir Temur va temuriylar haqidagi filmning Mo‘g‘ulistonda tasvirga olinadigan qismlari bo‘yicha fikr almashildi. Mo‘g‘uliston tarixiy voqealar bilan bog‘liq muhim joylarga ega bo‘lib, ushbu filmning ayrim sahnalari aynan shu hududlarda suratga olinishi rejalashtirilmoqda.
Eslatib o‘tamiz, davlatimiz rahbari tashabbusi bilan ishlab chiqilgan “Tirik tarix” turkum filmlar loyihasi 2024-2030-yillarga mo‘ljallangan strategik dastur bo‘lib, eng qadimgi tariximizdan tortib, yaqin tariximizgacha bo‘lgan muhim davrlarni qamrab oladi. Ushbu loyiha milliy o‘zlikni anglash, madaniy merosimizni keng targ‘ib qilish va yosh avlodga tarixiy bilimlarni yetkazishda muhim ahamiyat kasb etadi.