O‘zbekiston Respublikasi Madaniyat vazirligi

Kuni kecha Toshkent shahrida I.M.Gubkin nomidagi Rossiya davlat neft va gaz universiteti (NRU) filialida “Yoshlarda millatlararo munosabatlar madaniyatini shakllantirish milliy birlik asosi sifatida” mavzusida madaniy-ma’rifiy tadbir va amaliy seminar bo‘lib o‘tdi. Mazkur tadbir o‘quvchilarda milliy an’ana va qadriyatlarimizga hurmat tuyg‘usini shakllantirish, xorijiy davlatlar bilan madaniy-ma’rifiy aloqalarni kengaytirish maqsadida tashkil etildi.

Tadbirdan ko‘zlangan asosiy maqsad yoshlarni madaniy xilma-xillikka hurmat ruhida tarbiyalash, milliy birdamlikni mustahkamlashdan iborat bo‘ldi. Globallashuv va madaniy almashinuvlar sharoitida bu vazifalar ayniqsa dolzarb bo‘lib bormoqda, chunki o‘zaro hurmat va bag‘rikenglik qadriyatlarini shakllantirish jamiyatda tinchlik va millatlararo totuvlik rishtalarini mustahkamlaydi. Tadbir O‘zbekistonda muhim umumxalq bayrami – Navro‘z bayrami arafasida o‘tkazilgani ramziy ma’noga ega. Navro‘z yangilanish va bahor ramzi sifatida an’anaviy ravishda bag‘rikenglik va tinchlik bilan bog‘liq. 130 dan ortiq millat vakillari istiqomat qilayotgan O‘zbekistonda ushbu bayram millatlararo totuvlikni mustahkamlashda muhim ahamiyat kasb etadi.

Tadbirda madaniyat va jamoat tashkilotlari vakillari ham ishtirok etdi. O‘zbekiston Respublikasi Madaniyat vazirligining Millatlararo munosabatlar va xorijiy mamlakatlar bilan do‘stlik aloqalari qo‘mitasi huzuridagi Ilmiy-amaliy tadqiqotlar markazi rahbari S.T.Davlatova yoshlar o‘rtasida millatlararo muloqot madaniyatini shakllantirish, xalqlar o‘rtasida o‘zaro tushunishni rivojlantirish muhimligini ta’kidladi.

Tadbir davomida “Svitanak” belarus, qozoq, koreys markazlari uyushmasi, rus, tojik, tatar madaniy markazlari rahbarlari so‘zga chiqdilar. Madaniyat markazlarining har biri o‘z faoliyati haqida taqdimotlar o‘tkazishdi, shuningdek, o‘z xalqlarining madaniy an’analari va xususiyatlarini ochib beruvchi jonli badiiy va raqs chiqishlarini namoyish etishdi.

Bundan tashqari, madaniyat markazlari vakillari o‘z xalqlarining an’analari va madaniyatini yaqqol aks ettiruvchi hunarmandchilik buyumlari va amaliy san’at namunalarini ko‘rgazmasini tashkil etishdi. Bu talabalar va tadbir mehmonlariga turli xalqlarning boy madaniy xususiyatlari va hunarmandchiligi bilan yaqindan tanishish imkoniyatini berdi.

Yoshlarning millatlararo munosabatlar mavzusiga qiziqishi yuqori ekani, ularning dunyoqarashini kengaytirish, tafovutlarga hurmat tuyg‘usini shakllantirishda bunday uchrashuvlar muhim ahamiyat kasb etishini ta’kidladi. Madaniyat markazlari vakillari tomonidan namoyish etilgan jo‘shqin chiqishlar, musiqa va raqslar gulduros olqishlarga sabab bo‘ldi va talabalar uchun millatidan qat’i nazar, madaniyat odamlarni birlashtirishi mumkinligining yorqin namunasi bo‘ldi.

Madaniy-ma’rifiy tadbir millatlararo totuvlikni shakllantirish, milliy birdamlikni mustahkamlashda muhim qadam bo‘ldi. Ushbu tadbir o‘zaro tushunish va madaniy xilma-xillikni hurmat qilish muhimligini yana bir bor eslatdi. Bu, eng avvalo, boshqa xalqlarning urf-odatlari va madaniyatini hurmat qilish asosida jamiyatda umumiy farovonlik va barqarorlikni ta’minlashga xizmat qiladigan ahil va do‘stona munosabatlarni barpo etish mumkinligini namoyish etdi.

Taklif etilgan mehmonlarni samimiy kutib olgan Talabalar ko‘ngillilar tashabbusi ishtirokiga alohida e’tibor qaratish lozim. Ko‘ngillilar do‘stlik va hamjihatlik muhitini yaratib, yuqori darajadagi tashkilotchilik va mehmondo‘stlikni namoyish etdilar. Ularning ishi tadbirning muvaffaqiyatida muhim rol o‘ynadi va umumiy bayram tajribasiga yana bir jonli element qo‘shdi.

Navro‘z bayramiga bag‘ishlangan ushbu tadbirda ko‘pmillatli yurtda tinchlik, bag‘rikenglik va hamjihatlikning qadriga e’tibor qaratilgan. Bunday tashabbuslar yoshlarga ushbu qadriyatlarning ahamiyatini anglash, jamiyatda tinchlik va totuvlikni saqlash mas’uliyatini o‘z zimmasiga olishiga xizmat qilishi muhim.