O‘zbekiston Respublikasi Prezidentining “Teatrlarning jamiyat madaniy hayotidagi ahamiyatini oshirish va ular faoliyatini yanada  qo‘llab-quvvatlash chora-tadbiri to‘g‘risida” 2024-yil 22-noyabrdagi PQ–399-son qarori ijrosi hamda “Atrof-muhitni asrash va “Yashil iqtisodiyot” yili munosabati bilan Milliy mumtoz va zamonaviy adabiyotimizning yuqori badiiy-g‘oyaviy saviyaga ega asarlari inssenirovkasi uchun davlat buyurtmalari ochiq tanlov asosida amalga oshiriladi.

Tanlovga asarlar 2025-yilning 5-martidan 15-may sanasiga qadar belgilangan tartibda, ariza orqali Madaniyat vazirligining Milliy tanlovlar platformasi (https://milliytanlov.uz) hamda @inssenirovka_tanlovi_bot telegram boti orqali elektron shaklda qabul qilinadi.

Tanlovga yuboriladigan milliy mumtoz va zamonaviy mavzudagi asarlar asosida yaratilgan inssenirovkalar (janr va yo‘nalishidan qat’i nazar) quyidagi mezonlarga muvofiq bo‘lishi lozim:

milliy mumtoz va zamonaviy adabiyot namunalari asosida yaratilishi;

sahna dramaturgiyasi talablariga javob berishi;

inssenirovka uchun tanlangan asar muqaddam sahnalashtirilmagan bo‘lishi;

milliy mumtoz va zamonaviy adabiy asar muallifi hayot bo‘lsa yoki merosxo‘rlari bo‘lsa (ehtimoliy kelishmovchiliklarni oldini olish maqsadida) rozilik olinishi so‘raladi.

Tanlovga asarlar ariza orqali quyidagi tartibda qabul qilinadi:

Taqdim etiladigan inssenirovkalar o‘zbek tilida, Word formatda, 1,5 interval, 14 shriftda (grammatik va orfografik xatolari bor asarlar qabul qilinmaydi) ko‘chirilgan bo‘lishi hamda hajmi 20 sahifadan, qo‘g‘irchoq teatri uchun mo‘ljallangan inssenirovkalar esa 12 sahifadan kam bo‘lmasligi zarur.

Tanlovda yoshidan qat’i nazar, barcha ijodkorlar dramaturgiyaning dramatik, musiqali va qo‘g‘irchoq teatri uchun mo‘ljallangan inssenirovkalari bilan ishtirok etishi mumkin. 

Inssenirovkalar belgilangan tartibda yuborilmasa, murojaatlar ko‘rib chiqilmaydi.

Arizalar qabul qilish muddati tugaganidan so‘ng tanlovga kelib tushgan inssenirovkalar Baholash komissiyasi tomonidan 15 ish kunidan kechiktirmasdan ko‘rib chiqiladi va tanlov natijalari vazirlikning veb-sayti va ijtimoiy tarmoqlardagi sahifalari orqali ma’lum qilinadi.

Tanlovda g‘olib deb topilgan inssenirovkalar uchun davlat buyurtmasi mablag‘lari belgilan tartibda inssenirovka mualliflarining hisob raqamlariga o‘tkazib beriladi.