O‘zbekiston Respublikasi Madaniyat vazirligi

Bugun, 5-mart kuni O‘zbekiston madaniyat vaziri Ozodbek Nazarbekov hamda Belarus va Bangladesh davlatlarining mamlakatimizdagi Favqulodda va Muxtor Elchilari o‘rtasida ehtirom uchrashuvi bo‘lib o‘tdi.

 

Dastlab Belarus Respublikasining O‘zbekistondagi Favqulodda va Muxtor Elchisi Aleksandr Ogorodnikov bilan uchrashuv o‘tkazildi. Unda, so‘nggi yillarda O‘zbekiston va Belarus o‘rtasidagi hamkorlik madaniyat va san’at sohasida hamda boshqa barcha yo‘nalishlarda tobora rivojlanib borayotganligi, o‘tgan yillarda ikki davlat o‘rtasidagi madaniy-gumanitar aloqalar sezilarli darajada kengayganligi, xususan, Belarus vakillari muntazam ravishda O‘zbekistonda o‘tkazilib kelinayotgan “Sharq taronalari”, “Baxshi san’ati”, “Hunarmand” festivallarida ishtirok etib kelayotganligi ta’kidlandi.

 

Shuningdek, yig‘ilish davomida 2024-yilning 11-13-iyul kunlari O‘zbekiston delegatsiyasi Vitebsk shahrida bo‘lib o‘tgan “Slavyanskiy bazar” xalqaro festivalida qatnashib, festivalning Gran-pri sovrinini Toshkent shahridagi 1-son bolalar musiqa va san’at maktabi o‘quvchisi Yasmina Husniddinovaga nasib qilganligi hamda 11-iyul kuni Belarus Respublikasi Prezidenti Aleksandr Lukashenko unga Gran-prini topshirganligi tarixiy voqeaga aylandi. Bu voqea ikki davlat o‘rtasidagi madaniy hamkorlik tarixida muhim sahifa bo‘lib qolganligi e’tirof etildi.

 

So‘ng, O‘zbekiston madaniyat vaziri Ozodbek Nazarbekov hamda hamda Bangladesh Xalq Respublikasining O‘zbekistondagi Favqulodda va Muxtor Elchisi Muhammad Munirul Islom o‘rtasida ehtirom uchrashuvi bo‘lib o‘tdi.

 

Uchrashuv davomida O‘zbekiston va Bangladesh qadimdan o‘zaro mushtarak tarixiy, madaniy va diniy qadriyatlarga ega bo‘lgan ikki davlatdir ekanligi, xalqlarimizni bog‘lab turuvchi ma’naviy rishtalar, buyuk allomalarga bo‘lgan hurmat va madaniy an’analar bizning o‘zaro hamkorligimizni yanada chuqurlashtirish uchun mustahkam zamin yaratayotganligi, so‘nggi yillarda iqtisodiyot, axborot almashinuvi va madaniyat sohasida ham ko‘plab sohalarda hamkorligimiz rivojlanayotganligi ta’kidlandi.

 

Belarus va Bangladesh davlatlarining mamlakatimizdagi Favqulodda va Muxtor Elchilari o‘rtasida ehtirom uchrashuvlari o‘zaro hurmat va yuqori darajada bo‘lib o‘tdi.