“San’atkor odobi” mavzusida yig‘ilish bo‘lib o‘tdi
2025-03-03 19:00:00 / Yangiliklar
Mamlakatimizda konsert-tomosha faoliyatida olib borilayotgan madaniy-ma’rifiy ishlar hamda “San’atkor odobi” mavzusida yig‘ilish bo‘lib o‘tdi
Unda, vazirning birinchi o‘rinbosari Bahodir Ahmedov, “O‘zbekkonsert” davlat muassasasining rahbariyati, xodimlari, xonandalar, hududiy bo‘limlar rahbarlari, hududlardagi xonandalar (Zoom platformasi orqali) ishtirok etdilar. Yig‘ilish kun tartibidan mamlakatimizda ijod qilayotgan san’atkorlarning ma’naviy-madaniy faoliyati hamda “San’atkor odob-axloqi”, O‘zbekiston Respublikasida fuqarolarning vijdon erkinligini ta’minlash va diniy sohadagi davlat siyosati konsepsiyasini tasdiqlash to‘g‘risida"gi O‘zbekiston Respublikasi Qonunining mazmun-mohiyati, san’atkorlarning konsert-tomosha faoliyati uchun litsenziya talab va shartlari hamda mualliflik huquqi kabi masalalar o‘rin oldi.
Yig‘ilish avvalida O‘zbekiston Respublikasi Prezidentining 2024-yil 14-noyabrdagi “Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida”gi 184-Farmonining mazmun-mohiyati tushuntirildi. Konsert-tomosha faoliyatini amalga oshirish sohasiga oid majburiy talablardan xabardorligini oshirish bo‘yicha Farmon bilan tasdiqlangan Nizomning tartib-taomili bo‘yicha konsert tashkilotchilari va san’atkorlarga tushuntirish berildi.
Konsert-tomosha faoliyatini amalga oshirish sohasiga oid huquqbuzarlik xavfini tahlil etish tizimini joriy etish tartibi to‘g‘risidagi NIZOMga asosan Jismoniy va yuridik shaxslarning hamda davlat manfaatlariga zarar yetkazish xavfning oldini olish yoki bartaraf etish uchun (jismoniy va yuridik shaxslarning murojaatlari, davlat organlari va tashkilotlari ma’lumotlari, ommaviy axborot vositalari va boshqa axborot manbalaridan olingan ma’lumotlar), tadbirkorlik subyekti tegishli litsenziyasiz yoki ruxsat etuvchi hujjatlarsiz noqonuniy faoliyat va majburiy talablar ko‘rsatkichi bo‘yicha xavfni tahlil qilish axborot tizimi orqali holat aniqlanganda "O‘zbekkonsert" davlat muassasasi tomonidan tekshirish ishlari olib borilishi ta’kidlandi.
Yig‘ilish davomida “Litsenziyalash, ruxsat berish va xabardor qilish tartib-taomillari to‘g‘risida”gi O‘zbekiston Respublikasi Qonuniga asosan “O‘zbekkonsert” davlat muassasasi tomonidan konsert-tomosha faoliyatini amalga oshirishda san’atkorlarning majburiy talablarga rioya qilishini hamda asosiy litsenziya talablarida ijrochilarning “konsert-tomosha sohasida u yoki bu dinni targ‘ib qilmaslik” masalalari ham muhokama qilindi.
Shuningdek, yig‘ilishda O‘zbekiston Respublikasi Konstitutsiyasi qonunlari va boshqa qonunchilik hujjatlariga so‘zsiz rioya etishi, boshqa davlatlarda bo‘lganida o‘z mamlakat sha’nini e’zozlashi odob-axloq, madaniyat, o‘zbekona qadriyatlarni unutmaslik haqida so‘z bordi.
Vazirning birinchi o‘rinbosari Bahodir Ahmedov - milliy urf-odatlarimiz, qadriyatlarimiz va an’analarga hurmat bilan munosabatda bo‘lish, dabdababozlik, shohona hayotni ko‘z-ko‘z qilmaslik va boshqa salbiy illatlarga yo‘l qo‘ymaslik, jamoat joylarida, atrofdagilar e’tiborini tortuvchi ortiqcha salbiy harakatlarga yo‘l qo‘ymaslik haqida ta’kidlab o‘tdi .
Shu bilan birga kuy-qo‘shiqlarning mazmuniga e’tibor qaratish, mualliflik huquqlarining buzilish holatlariga ham to‘xtalib o‘tdi. Shuningdek, o‘z ijodlari davomida vatanga muhabbat, sadoqat, vatanparvarlik ruhidagi qo‘shiqlarni ko‘paytirish, o‘sib kelayotgan yosh avlodga namuna bo‘lishlari aytib o‘tildi.