O‘zbekiston Respublikasi Madaniyat vazirligi

 

Madaniyat vazirligida buyuk shoir va mutafakkirlar Alisher Navoiy va Zahiriddin Muhammad Bobur tavallud sanalariga bag‘ishlangan “Ikki buyuk siymo: ma’naviyatimiz sarchashmalari” mavzusida ma’naviy-ma’rifiy tadbir o‘tkazildi.

 

O‘zbekiston xalq artistlari Afzal Rafiqov, Muhammadali Abduqunduzov hamda O‘zbekistonda xizmat ko‘rsatgan artist Ilyos Arabov ishtirok etgan tadbirda ikki buyuk shaxsning hayoti va faoliyati, bebaho ijodiy-ma’naviy merosining milliy madaniyatimiz va adabiy-estetik tafakkurimiz rivojidagi ahamiyati haqida so‘z yuritildi. Adabiy muloqotni madaniyat vazirining maslahatchisi Shavkat Ortiqov olib bordi. 

 

Ma’lumki, Navoiy g‘azallarini o‘qib, targ‘ib qilishda Afzal Rafiqovning xizmatlari beqiyos. Ustoz san’atkor, jumladan, “Xamsa”ning besh dostonidan parchalarni simfonik orkestr jo‘rligida tomoshabinlar e’tiboriga havola etib, katta e’tirof qozongan. Uchrashuvda aynan Afzal Rafiqov tomonidan Alisher Navoiy satrlari ijro etilgan video parcha namoyish qilindi. 

   

“Hazrat Navoiy asarlari tufayli hayotim butunlay boshqa tomonga o‘zgargan. Ulug‘ ajdodimizning har bir satrida sehr, buyuk qudrat, mo‘jiza yashiringan. Uning o‘ziga xos ohanrabosi bor. Har yili fevral oyida ikki buyuk siymo – Alisher Navoiy va Zahiriddin Muhammad Bobur hayotiga, ijodiga alohida e’tibor qaratamiz. Ularni xotirlaymiz, adabiy merosiga murojaat qilamiz. Bu juda yaxshi va zarur. Shu bois fevral oyini “Nazm oyi” deb atasak ham xato bo‘lmaydi” – deya ta’kidladi Afzal Rafiqov.

 

Shundan so‘ng “Bobur” videofilmidan parcha namoyish etildi. Mazkur videofilmda ulug‘ shoir va davlat arbobi siymosini aynan Muhammadali Abduqunduzov gavdalantirgani xalqimizga yaxshi ma’lum. Ustoz san’atkor bu haqda so‘z yuritar ekan, “Bobur” videofilmining ilk namoyishi o‘tkazilganiga bu 35 yil to‘lganini bildirdi. O‘z navbatida, Bobur hayoti haqida monolog o‘qib berdi. 

 

“Hayotda armoningiz bormi?” deb so‘rashsa, hech ikkilanmay yo‘q deya javob beraman, chunki millatimizning ikki buyuk shaxsi – Zahiriddin Muhammad Bobur va Cho‘lpon siymosini gavdalantirish menga nasib etgan. Bunday aktyorda armon nima qilsin”, dedi Muhammadali Abduqunduzov.

 

Tadbirda O‘zbekistonda xizmat ko‘rsatgan artist Ilyos Arabov Navoiy va Bobur g‘azallariga bastalangan qo‘shiqlardan ijro etdi.