Vazir Ozodbek Nazarbekov madaniyat sohasidagi Turkiya tajribasini o‘rganish yuzasidan tayyorlangan loyiha taqdimoti bilan tanishdi
2025-02-11 11:00:00 / Yangiliklar
O‘zbekiston madaniyat vaziri Ozodbek Nazarbekov madaniyat va san’at sohasidagi boshqaruv jarayonini jahon andozalari darajasida olib borish yuzasidan Turkiya tajribasi asosida tayyorlangan loyiha taqdimoti bilan tanishdi.
Taqdimotda vazir o‘rinbosarlari hamda vazirlik markaziy apparatining boshqarma va bo‘lim boshliqlari ishtirok etishdi.
Taqdimot davomida milliy madaniyatimizni keng targ‘ib qilishda boshqaruv tizimining muhim xususiyatlaridan o‘z o‘rnida foydalanish lozimligi ta’kidlanib, aynan turk tajribasining bu boradagi yutuqlari yuqori ekanligi haqida ma’lumot berildi.
Shuningdek, ushbu tajribadan andoza olish va uni ishlab chiqish yuzasidan yig‘ilganlarning taklif va mulohazalari tinglandi.
Ushbu loyihaning amalga oshirilishi xalqimizning ma’naviy-axloqiy va madaniy darajasini yanada yuksaltirish, aholi, ayniqsa, yoshlar qalbi va ongiga mustaqillik, yuksak ma’naviyat, insonparvarlik an’analariga sadoqat, milliy o‘zlikni anglash g‘oyalarini chuqur singdirish, moddiy va nomoddiy madaniy merosimizni yanada ommalashtirish, shuningdek, aholining madaniyat va san’at sohasidagi huquqiy madaniyatini yuksaltirishga doir ishlar samaradorligini yanada oshirish maqsad qilinganligiga alohida urg‘u berildi.
Ma’lumot uchun, vazirlik markaziy apparatining bir guruh boshqarma va bo‘lim boshliqlari madaniyat va san'at sohasinining boshqaruv mexanizmlarida turk tajribasini o‘rganish maqsadida, 2024-yilning oktyabr oyi davomida Turkiya Respublikasida bir muddat malaka oshirishgan edi.