Yaponiyaning “Yaponiya-O‘zbekiston iqtisodiy, madaniyat va sport hamkorlik jamiyati” vakillari bilan hamkorlik uchrashuvi bo‘lib o‘tdi
2025-01-30 15:00:00 / Yangiliklar
Madaniyat vazirining birinchi o‘rinbosari Avazxon Tadjixanov hamda Yaponiyaning “Yaponiya-O‘zbekiston iqtisodiy, madaniyat va sport hamkorlik jamiyati” raisi Tetsuro Yamasaka o‘rtasida hamkorlik uchrashuvi bo‘lib o‘tdi.
Uchrashuv davomida, madaniyat sohasida ham ikki davlat o‘rtasida keng hamkorlik xususida fikr yuritildi.
Xususan, kuni kecha Prezidentning 2023-yil 25-dekabrdagi “Aholiga madaniy xizmat ko‘rsatish darajasini yanada oshirish chora-tadbirlari to‘g‘risida”gi 406-sonli Qaroriga ko‘ra, ta’sis etilgan “O‘zbek madaniyati elchisi” maqomi ilk marotaba yaponiyalik taniqli qo‘shiqchi va sozanda – Komazaki Mashuniga berilganligi alohida ta’kidlandi.
Ushbu qarorga ko‘ra, o‘zbek milliy madaniyatimizni xorijiy davlatlarda faol targ‘ib etish va ommalashtirish bilan shug‘ullanuvchi chet el fuqarolari, jumladan vatandoshlar faoliyatini rag‘batlantirish va qo‘llab-quvvatlash maqsadida “O‘zbek madaniyati elchisi” maqomini berish tizimi joriy etilishi belgilangan.
“O‘zbekiston Respublikasi Madaniyat vazirligi nomidan sizni, janob Yamasaka va "Balcom Group" kompaniyasining vakillarini, O‘zbekistonga tashrif buyurganingiz uchun samimiy tabriklayman. Ushbu uchrashuv ikki davlat o‘rtasidagi madaniy hamkorlikni yanada rivojlantirish va qo‘shma loyihalarni amalga oshirish uchun muhim imkoniyatdir.
O‘zbekiston va Yaponiya o‘rtasida uzoq yillik do‘stona munosabatlar mavjud. Bizning mamlakatimiz yapon hamkasblarining yuqori texnologiyalar, innovatsiyalar va tashabbuskorligini yuqori baholaydi. Madaniyat sohasida ham ikki davlat o‘rtasida keng hamkorlik imkoniyatlari mavjud. O‘zbekiston boy madaniy merosga ega bo‘lib, Yaponiya esa o‘zining noyob an’analari va zamonaviy madaniy yutuqlari bilan dunyoga namuna bo‘lmoqda” – dedi Avazxon Tadjixanov.
Uchrashuv yakunida Ikki tomonlama almashinuvlarni tashkil etish, Koguri raqs festivalini O‘zbekistonda o‘tkazish, Yaponiyaning bir qator shaharlarida O‘zbekiston madaniyatini targ‘ib etuvchi madaniy tadbirlarni birgalikda tashkil etish haqida firklashildi.