Nukus shahrida Qoraqalpog‘iston Respublikasida faoliyat yuritayotgan soha vakillarining bir guruhiga “Madaniyat va san’at fidokori” ko‘krak nishoni hamda "Alg‘is―2024" mukofotining tantanali topshirish marosimi bo‘lib o‘tdi.

 

Tadbir avvalida O‘zbekiston Respublikasi madaniyat vaziri Ozodbek Nazarbekov so‘zga chiqib, quyidagilarni ta’kidladi:

 

"Sizlar bilan Vatanimizning shimoliy darvozasi bo‘lgan Qoraqalpog‘istonda ko‘rishib turganimdan behad mamnunman.

Barchangizga yaxshi ma’lumki, Hurmatli Prezidentimiz Qoraqalpog‘iston Respublikasiga alohida e’tibor qaratib, hududni ijtimoiy-iqtisodiy jihatdan rivojlantirish bo‘yicha juda katta tashabbuslarni ilgari surib kelmoqdalar.

Shu asosda keyingi yillarda Orolbo‘yini yanada obod qilish, bu yerning mard va tanti, samimiy hamda mehnatkash aholisiga munosib turmush sharoitlarini yaratish, ish va daromad manbai bilan ta’minlash borasida ko‘plab loyihalar amalga oshirilmoqda.

Zero, Davlatimiz Rahbari takror va takror ta’kidlaganlaridek, “Qoraqalpog‘istonning taqdiri – bu O‘zbekistonning taqdiri, qoraqalpoq xalqining baxti va farovonligi – bu butun O‘zbekiston xalqining baxti va farovonligidir”.

Yurakdan aytilgan ushbu samimiy so‘zlar har birimizning ayni dilimizdagi niyat va maqsadlarning hayotiy ifodasi bo‘lib, Qoraqalpog‘istonning har tomonlama taraqqiy etishiga munosib hissa qo‘shish – biz uchun ham burch, ham katta sharafdir.

Shu ma’noda, mazkur tashrifimiz doirasida hududda madaniyat va san’at sohasida islohotlarni jadallashtirish, aholining maroqli dam olishini, yoshlarning bo‘sh vaqtini mazmunli tashkil etish hamda ularga madaniy xizmat ko‘rsatish sifatini oshirishda samarali mehnat qilganlarni munosib taqdirlash lozim. Shunga ko‘ra bir guruh qoraqalpog‘istonlik madaniyat va san’at sohasi vakillarini taqdirlaymiz."

 

So‘ng, “Madaniyat va san’at fidokori” ko‘krak nishoni hamda "Alg‘is―2024" mukofotlarini O‘zbekiston Respublikasi madaniyat vaziri Ozodbek Nazarbekov, Qoraqalpog‘iston Respublikasi Jo‘qorg‘i Kengesi qo‘mita raisi Murat Atamuratov, Qoraqalpog‘iston Respublikasi madaniyat vaziri Begis Temirbayevlar o‘z egalariga topshirishdi.