Ayni kunlarda Yunus Rajabiy nomidagi O‘zbek milliy musiqa san’ati instituti vakillari Turkiya Respublikasining Anqara shahrida bo‘lib turibdi.

 

Xizmat safari doirasida institut vakillari TURKSOY – Turkiy madaniyat tashkiloti bosh kotibi o‘rinbosari Sayid Yusuf bilan uchrashuv o‘tkazdi.

 

Samimiy va do‘stona ruhda o‘tgan yig‘ilishda xalqaro tashkilot hamda O‘zMMSI o‘rtasidagi hamkorlik masalalari muhokama qilindi. O‘z navbatida, maqom, katta ashula va baxshichilik yo‘nalishlarida chop etilgan adabiyotlarni bosqichma-bosqich turk tiliga tarjima qilishga kelishib olindi.

 

Shuningdek, institutda CI ilmiy laboratoriyasini ochishda hamkorlik qilish, 10 nafar professor-o‘qituvchi stajirovkasini yo‘lga qo‘yish masalasi ham atroflicha ko‘rib chiqildi. Turkiy davlatlar tashkilotiga a’zo madaniyat va san’at yo‘nalishidagi oliy ta’lim muassasalari reytingini tashkil qiluvchi alohida markaz tashkil etish g‘oyasi ham ilgari surildi.

 

Muloqot chog‘ida xalqaro forumlar, madaniy tadbirlar jadvalini kengaytirish, san’at yo‘nalishidagi aloqalarni yanada rivojlantirish zarurligi ta’kidlandi.

 

Delegatsiya vakillarining tashrifi davom etmoqda.