Senatda “O‘zbekiston Respublikasining ayrim qonun hujjatlariga jonli ijro san’atini yanada rivojlantirishga qaratilgan o‘zgartirish va qo‘shimchalar kiritish to‘g‘risida”gi Qonun muhokama qilindi
2025-01-10 15:00:00 / Yangiliklar
Kuni kecha Senatning Yoshlar, xotin-qizlar, madaniyat va sport masalalari qo‘mitasining navbatdagi majlisi bo‘lib o‘tdi.
Unda “O‘zbekiston Respublikasining ayrim qonun hujjatlariga jonli ijro san’atini yanada rivojlantirishga qaratilgan o‘zgartirish va qo‘shimchalar kiritish to‘g‘risida”gi Qonuni muhokama qilindi.
Majlisda senatorlar, madaniyat vaziri o‘rinbosari Murodjon Majidov, Madaniyat vazirligi mas’ullari, ekspertlar, shuningdek, hududlardan mahalliy Kengashlarning Yoshlar siyosati, madaniyat va sport masalalari komissiyalari hamda Yoshlar parlamenti a’zolari ishtirok etdi.
Qonun bilan tadbirlar tashkil etish va o‘tkazishda jonli ijro yoki fonogrammadan foydalanish shakli va darajasini aniq belgilash, ijrochilar tomonidan fonogramma va mualliflik asarlaridan foydalanish bo‘yicha amaldagi qonunchilikka rioya etishlarini monitoring qilish hamda milliy san’at va madaniyat nufuzini oshirishga xizmat qilayotgan ijodkorlarni qo‘llab-quvvatlash yuzasidan chora-tadbirlarni amalga oshirish nazarda tutilmoqda.
Bundan tashqari, fonogrammadan foydalanish darajasi haqida axborot berish tartibi, konsert-tomosha tadbirining dasturida ijrochilar va asar mualliflari aniq ko‘rsatilishi shart ekanligi hamda konsert-tomosha tadbiri reklamasida fonogrammadan foydalanish darajasi to‘g‘risidagi axborot umumiy reklama maydonining (sathining) kamida o‘n foizini tashkil etishi to‘g‘risidagi qo‘shimcha va o‘zgartirishlar kiritilmoqda.
Shuningdek, konsert-tomosha tadbirlarida musiqali va boshqa asarlarni ijro etishda fonogrammadan foydalanish darajasiga qarab ijrochilar tomonidan ijro qilish usullari belgilanmoqda.
Ushbu Qonunning qabul qilinishi konsert-tomosha tadbirlarini tashkil etish samaradorligini oshirishga, jonli ijro san’atini rivojlantirishga, iste’dodli ijrochilarni qo‘llab-quvvatlashga, jonli ijroni rag‘batlantirishning yangi mexanizmlarini joriy etishga xizmat qiladi.
Majlis so‘nggida Qo‘mitaning tegishli qarori qabul qilindi.
Manba: https://senat.uz/events/post-3207