O‘zbekiston Respublikasi Madaniyat vazirligi

Bugun, 21-dekabr kuni madaniyat vaziri Ozodbek Nazarbekov Ichki ishlar vazirligi akademiyasida bo‘lib, Ichki ishlar vazirligi akademiyasi magistratura tinglovchilari bilan uchrashdi.

 

Tadbirda muhtaram Prezidentimiz boshchiligida amalga oshirilayotgan ezgu ishlar, xalqimiz hayotida ro‘y berayotgan o‘zgarishlar, san’at va madaniyat sohadagi islohotlar haqida so‘z bordi.

 

Vazir Ozodbek Nazarbekov yurtimizda inson qadri va farovonligini yuksaltirish yo‘lida qilinayotgan xayrli ishlarga to‘xtalib, keyingi yillarda madaniyat sohada amalga oshirilayotgan islohotlar dunyo hamjamiyati tomonidan yuqori baholanayotganini e’tirof etdi.

 

Uchrashuvda Vatanimizning qadimiy va boy tarixga ega madaniyatini chuqur o‘rganish, yosh avlodni milliy qadriyatlar va ajdodlarimizning bebaho merosi asosida tarbiyalash, jamiyatda vatanparvarlik va o‘z xalqi bilan g‘ururlanish tuyg‘usini shakllantirish, vatandoshlarimiz dunyoqarashini kengaytirish maqsadida oldimizda ko‘plab vazifalar turgani ta’kidlandi.

 

"Madaniyat sohasi vakillari huquqni muhofaza qiluvchi organlari ayniqsa, ichki ishlar organlari xodimlari bilan kelishgan holda yoshlar o‘rtasidagi huquqbuzarliklar va jinoyatchiliklarni oldini olishga qaratilgan ko‘plab profilaktik chora-tadbirlarni amalga oshirishlari, ularni Vatanparvar bo‘lib kamolga yetishlari uchun bor imkoniyatlarni safarbar etishlarini, turli yod g‘oyalar og‘ushiga tushib qolmasliklari uchun axborot-mafkuraviy tahdidlarga qarshi tarbiyaviy targ‘ibot ishlarini kuchaytirishimiz lozim" – dedi Ozodbek Nazarbekov.

 

Uchrashuv davomida tadbir ishtirokchilari O‘zbekiston Madaniyat vazirligining faoliyati haqida ma’lumotlarga ega bo‘lishdi.

 

Shuningdek, vazir Ozodbek Nazarbekov Ichki ishlar vazirligi akademiyasida yaratilgan sharoitlar bilan tanishib, Akademiya faoliyati aks ettirilgan videorolikni ko‘rdi.