O‘zbekiston bilan Qirg‘iz Respublikalari chegaradosh davlatlar bo‘lib, azaldan ikki xalqni boy do‘stona qadriyatlar, tili va dini, tarixi, urf-odat va an’analari, madaniyati bog‘lab turadi.

Bugungi kunga kelib bu ko‘hna qadriyatlarimiz yanada sayqal topmoqda. Ikki davlat rahbarlarining siyosiy irodasi tufayli o‘zaro aloqalarimiz mohiyatan yangicha shakl va mazmun kasb etmoqda. Ayniqsa, keyingi yillarda bu borada misli ko‘rilmagan o‘zgarishlar yuz berdi. Xalqlarimiz manfaatlari yo‘lida ikki tomonlama munosabatlar, xususan madaniy hamkorlik aloqalari yangi bosqichga ko‘tarildi.

Bunga ko‘plab misollar keltirishimiz mumkin, jumladan joriy yilning sentyabr oyida ikki davlat rahbarlarining tegishli Farmonlariga asosan,

O‘zbekiston Respublikasi Prezidentining "Qirg‘iz Respublikasining madaniyat va san’at sohalari vakillaridan bir guruhiga faxriy unvonlar berish to‘g‘risida"gi Farmoniga ko‘ra,

"O‘zbekiston Respublikasi xalq artisti" faxriy unvoni bilan - Omurbayev Nur Santashevich - To‘qto‘g‘ul Satilganov nomidagi Qirg‘iz milliy filarmoniyasining estrada-simfonik orkestri badiiy rahbari va bosh dirijori hamda "O‘zbekiston Respublikasida xizmat ko‘rsatgan artist" faxriy unvoni bilan - Duyshenbek uulu Zakirbek - Qirg‘iz Respublikasidagi erkin ijodkor, komuz sozandasi taqdirlangan bo‘lsa, Qirg‘iz Respublikasi Prezidentining "Qirg‘iz Respublikasi faxriy unvonlarini berish to‘g‘risida"gi Farmoniga ko‘ra,

"Qirg‘iz Respublikasi xalq artisti" faxriy unvoni bilan - O‘zbekiston Respublikasi Madaniyat vaziri Ozodbek Nazarbekov hamda  "Qirg‘iz Respublikasida xizmat ko‘rsatgan artist" faxriy unvoni bilan - Yunus Rajabiy nomidagi O‘zbek milliy musiqa san’ati instituti “An’anaviy maqom ijrochiligi” kafedrasi katta o‘qituvchisi Farangiz Mahmudova taqdirlangan edi.

13-dekabr kuni Qirg‘iz Respublikasi Prezidenti Sadir Japarov O‘zbekiston Respublikasi madaniyat vaziri Ozodbek Nazarbekovni qabul qilib, Qirg‘iz va O‘zbekiston Respublikalari o‘rtasidagi madaniy do‘stlik rishtalarini mustahkamlashdagi mehnatlari uchun O‘zbekiston madaniyat vaziri  Ozodbek Nazarbekovni “Qirg‘iz Respublikasi xalq artisti” unvonini topshirdi.

Uchrashuv davomida  “Xalqlarimizni ko‘p asrlik do‘stlik va yaxshi qo‘shnichilik rishtalari birlashtirib turadi. 1992-yilda diplomatik munosabatlar o‘rnatilganidan buyon ikki tomonlama aloqalar yangi bosqichga ko‘tarildi va bu hamkorlikni mustahkamlashda madaniyat muhim o‘rin tutadi”, — dedi Qirg‘iz Respublikasi Prezidenti  Sadir Japarov.

 Shuningdek, Qirg‘iz Respublikasi Prezidenti Sadir Japarov O‘zbekistonga davlat tashrifi doirasida Toshkent va Buxoro shaharlarida Qirg‘iz Respublikasining O‘zbekistondagi madaniyat kunlari o‘tkazilganini, unda qirg‘iz-o‘zbek do‘stligiga bag‘ishlangan gala-konsert, ko‘rgazmalar, kinofilmlar namoyish etilganini eslab, 2025-yilda Qirg‘iz Respublikasida bo‘lib o‘tadigan O‘zbekiston madaniyati kunlari ikki xalqning yanada yaqinlashishida muhim voqea bo‘lishiga ishonch bildirdi.

 15-dekabr kuni To‘qto‘g‘ul Satilganov nomidagi Qirg‘iz milliy filarmoniyasida o‘zbek va qirg‘iz san’at ustalari ishtirokida “Qirg‘iz-o‘zbek do‘stligi” musiqiy kechasi bo‘lib o‘tdi.

Unda, Qirg‘iz Respublikasi hukumati vakillari,  Qirg‘iz va O‘zbekistonning madaniy va ishbilarmonlik doiralari vakillari, diplomatlar va san’at namoyondalari ishtirok etdi.

“Qirg‘iz-o‘zbek do‘stligi” musiqiy kechasi davomida Qirg‘iz Respublikasi Prezidentining "Qirg‘iz Respublikasi faxriy unvonlarini berish to‘g‘risida"gi Farmoniga ko‘ra, "Qirg‘iz Respublikasida xizmat ko‘rsatgan artist" faxriy unvoni bilan taqdirlangan Yunus Rajabiy nomidagi O‘zbek milliy musiqa san’ati instituti katta o‘qituvchisi Farangiz Mahmudovaga  Qirg‘iz Respublikasi Vazirlar Mahkamasi raisining oʻrinbosari Edil Baysalov tomonidan faxriy unvon tantanali topshirildi.

Shuningdek, O‘zbekiston Respublikasi Prezidentining "Qirg‘iz Respublikasining madaniyat va san’at sohalari vakillaridan bir guruhiga faxriy unvonlar berish to‘g‘risida"gi Farmoniga ko‘ra, "O‘zbekiston Respublikasi xalq artisti" faxriy unvoni bilan taqdirlangan - Omurbayev Nur Santashevich - To‘qto‘g‘ul Satilganov nomidagi Qirg‘iz milliy filarmoniyasining estrada-simfonik orkestri badiiy rahbari va bosh dirijori hamda "O‘zbekiston Respublikasida xizmat ko‘rsatgan artist" faxriy unvoni bilan taqdirlangan - Duyshenbek uulu Zakirbek - Qirg‘iz Respublikasidagi erkin ijodkor, komuz sozandasiga O‘zbekiston Respublikasi madaniyat vaziri Ozodbek Nazarbekov tomonidan faxriy unvonlar tantanali topshirildi.

Shuni alohida e’tirof etish kerakki, madaniy aloqalar rivoji davlatlar o‘rtasida yaxshi qo‘shnichilik aloqalarining mustahkamlanishi ikki qardosh xalq, ikki davlat o‘rtasida hamkorlik va yaxshi qo‘shnichilik, o‘zaro hurmat hamda teng huquqlilikka asoslangan do‘stlik munosabatlarini yanada mustahkamlashga qaratilgan.