O‘zbekiston Respublikasi Madaniyat vazirligi huzuridagi Kinematografiya agentligi O‘zbekiston, Turkiya va Qirg‘iziston kabi turkiy davlatlar hamkorligida ishlab chiqarilishi rejalashtirilgan “Qardoshlik g‘alabasi” nomli to‘liq metrajli badiiy film yaratish bo‘yicha sinopsislarga TANLOV E’LON QILADI!

 

Tanlovga taqdim etiladigan sinopsislarda bosh g‘oya sifatida Turkiy davlatlar o‘rtasidagi o‘zaro turkiy birlik, azaliy qardoshlik, millatlararo hamdo‘stlik, davlatlararo iqtisodiy, ijtimoiy va siyosiy hamkorlik, tinchlik-totuvlik kabi muqaddas g‘oyalar ilgari surilishi lozim.

 

Shuningdek, sinopsis leytmotivi sifatida Qirg‘iziston o‘g‘loni Munarbek Seitbek o‘g‘lining hayoti, uning sportdagi faoliyati hamda 2024-yili Fransiya poytaxti Parij shahrida o‘tkazilgan “Olimpiada musobaqalari-2024”da sportning boks turi bo‘yicha eng yengil vazn toifasida qatnashib, o‘zining shaxsiy murabbiyi akkreditatsiyadan o‘tkazilmagani bois O‘zbekistonlik tajribali murabbiy Akmal Hasanov tomonidan sekundantlik qilingani va sportchi kumush medal sohibi bo‘lgani aks ettiriladi.

 

Mazkur xalqaro loyiha asosida ishlab chiqariladigan badiiy film real voqealarga asoslangan holda bo‘lib, undagi syujet liniyalarini boyitish maqsadida ayrim badiiy to‘qimali sahnalar qo‘shilishiga ham ruxsat beriladi.

 

▪️ Tanlovga taqdim etilgan ssenariy (sinopsislar) quyidagi talablarga muvofiq bo‘lishi lozim:

▪️ o‘zbek va rus tillarida, adabiy til va imlo qoidalariga rioya qilingan holda A4 formatda, “Courier New” klassik 12 shriftda, 1,5 intervalda 3-5 varaqdan kam bo‘lmagan shaklda yozilgan bo‘lishi kerak;

▪️ sinopsisda filmning asosiy qahramonlari, ularning o‘ziga xos xarakteri, asosiy syujet liniyasi, voqealar, avj nuqtasi va yechimi aks etgan bo‘lishi kerak;

▪️ Kinofilm taqdimoti (ijodiy guruh, aktyorlar, lokatsiyalar va boshqa ma’lumotlar).

 

Tanlov 2024-yilning 17-dekabridan 31-yanvar sanasiga qadar davom etadi. Sinopsislar belgilangan muddatlarda tanlov ishtirokchilarining arizasi, ismi-sharifi va u haqida qisqacha ma’lumotni biriktirgan holda Kinematografiya agentligiga taqdim etilishi lozim.

 

Eslatma!

 

Tanlovga taqdim etilgan sinopsislar taqriz qilinmaydi va mualliflarga qaytarilmaydi.

 

Shuningdek, tanlovga taqdim etiladigan sinopsislarda O‘zbekiston va Qirg‘iziston Respublikalarining Konstitutsiyalariga zid bo‘lgan, mamlakatlarning qonunchiligi va daxlsizligiga putur yetkazuvchi, ularning xavfsizligiga tahdid soluvchi, o‘zaro ijtimoiy, iqtisodiy, irqiy, milliy, diniy, mulkiy munosabatlariga zid keluvchi, qabilaviy adovat uyg‘otuvchi, jinsiy zo‘ravonlik va zo‘ravonlikning boshqa shakllarini targ‘ib qiluvchi g‘oyalar mavjud bo‘lsa, ular to‘laqonli rad etiladi.

 

Qo‘shimcha ma’lumot uchun telefon: 71 277-81-49

Manzil: Toshkent shahri, Chilonzor ko‘chasi, 1A-uy.

“Renessans” kino uyi.