Vazir Ozodbek Nazarbekov Madaniyatshunoslik va nomoddiy madaniy meros ilmiy-tadqiqot institutida bo‘ldi
2024-12-04 12:00:00 / Yangiliklar
Kuni kecha madaniyat vaziri Ozodbek Nazarbekov vazirlik huzuridagi Madaniyatshunoslik va nomoddiy madaniy meros ilmiy-tadqiqot institutiga tashrif buyurdi.
Tashrifdan ko‘zlangan asosiy maqsad ilmiy-tadqiqot instituti moddiy-texnik bazasini ko‘zdan kechirish, institut jamoasi bilan ochiq suhbat o‘tkazish bo‘lib, tashrif yakunida institut jamoasiga mehnat faoliyatida kerakli texnik uskunalar taqdim etildi.
Suhbat davomida vazir oz fursat ichida munosib muvaffaqiyatlarni qayd etayotgan institut faoliyatini ijobiy baholab, barcha amallar va kelgusi rejalar ilmga tayangan holda bo‘lishi kerakligini urg‘uladi. Ayni shu nuqtayi nazardan, Madaniyatshunoslik va nomoddiy madaniy meros ilmiy-tadqiqot institutining soha ravnaqi yo‘lidagi ahamiyatini yuqori baholadi.
Ma'lumot o‘rnida: O‘zbekiston Respublikasi Madaniyat vazirligi huzuridagi Madaniyatshunoslik va nomoddiy madaniy meros-ilmiy tadqiqot instituti O‘zbekiston Respublikasi Prezidentining 2023-yil 27-iyuldagi “Ma’muriy islohotlar doirasida madaniyat va turizm sohasida davlat boshqaruvini samarali tashkil qilish chora-tadbirlari to‘g‘risida” PF-114-son Farmoni hamda 2023-yil 25-dekabrdagi “Nomoddiy madaniy merosni muhofaza qilish, ilmiy o‘rganish va targ‘ib qilishni rivojlantirishga oid qo‘shimcha chora-tadbirlar to‘g‘risida” PQ-405-son qarorlari asosida, sobiq Respublika madaniyat muassasalari faoliyatini tashkil etish ilmiy-metodik markazi o‘rnida qayta tashkil etilgan.